சிவகார்த்திகேயனின் அமரன் படத்துடன் மோதும் ஜெயம் ரவியின் ‘பிரதர்’!

ஜெயம் ரவி நடிக்கும் பிரதர் படத்தின் ரிலீஸ் குறித்த அறிவிப்பு வெளியாகி உள்ளது.

ஜெயம் ரவி கடைசியாக இறைவன், சைரன் உள்ளிட்ட படங்களில் நடித்திருந்தாலும் இந்த இரண்டு படங்களுமே ஜெயம் ரவிக்கு எதிர்பார்த்த வெற்றியை தரவில்லை. இருப்பினும் பொன்னியின் செல்வன் படத்தின் பிரம்மாண்ட வெற்றிக்கு பிறகு தொடர்ந்து பல படங்களில் பிஸியாக நடித்து வருகிறார் ஜெயம் ரவி. அந்த வகையில் காதலிக்க நேரமில்லை, ஜீனி போன்ற படங்களை கைவசம் வைத்துள்ள இவர், பிரதர் எனும் திரைப்படத்திலும் நடித்துள்ளார். இந்த படத்தை சிவா மனசுல சக்தி, பாஸ் என்கிற பாஸ்கரன் உள்ளிட்ட படங்களை இயக்கிய எம் ராஜேஷ் இயக்கியிருக்கிறார். ஸ்கிரீன் சீன் மீடியா நிறுவனம் இந்த படத்தை தயாரிக்க ஹாரிஸ் ஜெயராஜ் இதற்கு இசை அமைத்துள்ளார். இந்த படத்தில் ஜெயம் ரவி தவிர பிரியங்கா அருள் மோகன், பூமிகா சாவ்லா, சரண்யா பொன்வண்ணன், சீதா நட்டி நடராஜ் உள்ளிட்ட பலரும் நடித்திருக்கின்றனர். ஏற்கனவே இந்த படத்தின் படப்பிடிப்புகள் நிறைவடைந்து தற்போது பின்னணி வேலைகள் நடைபெற்று வருகிறது. அதே சமயம் கடந்த சில தினங்களுக்கு முன்பாக இந்த படத்தின் மக்காமிஷி எனும் பாடல் வெளியாகி இணையத்தில் ட்ரெண்டாகி வருகிறது. மேலும் சமீபத்தில் இந்த படமானது தீபாவளியை முன்னிட்டு வெளியாகும் என்று சமூக வலைதளங்களில் செய்திகள் பரவி வந்தன. அதன்படி தற்போது பிரதர் படமானது தீபாவளிக்கு ரிலீஸ் செய்யப்படும் என்று பட குழுவினர் புதிய போஸ்டர் ஒன்றை வெளியிட்டு அதிகாரப்பூர்வமாக அறிவித்துள்ளனர்.