சூர்யா 45 படத்தின் இயக்குனர் குறித்த தகவல் வெளியாகி உள்ளது.
நடிகர் சூர்யா தமிழ் சினிமாவில் உச்ச நட்சத்திரமாக வலம் வருபவர். இவருடைய நடிப்பில் தற்போது உருவாகி இருக்கும் கங்குவா திரைப்படம் வருகின்ற நவம்பர் 14ஆம் தேதி உலகம் முழுவதும் வெளியாக இருக்கிறது. அதேசமயம் சூர்யா, கார்த்திக் சுப்பராஜுடன் கூட்டணி அமைத்து புதிய படம் ஒன்றில் நடித்து வருகிறார். சூர்யா 44 என்று தற்காலிகமாக தலைப்பு வைக்கப்பட்டுள்ள இந்த படத்தினை சூர்யாவும், கார்த்திக் சுப்புராஜும் இணைந்து தயாரித்து வருகின்றனர். சந்தோஷ் நாராயணன் படத்திற்கு இசையமைக்கிறார். இந்த படத்தின் படப்பிடிப்புகள் ஏற்கனவே தொடங்கப்பட்டு தற்போது இறுதி கட்டத்தை நெருங்கி இருப்பதாக சொல்லப்படுகிறது. விரைவில் படத்தின் டைட்டிலும் வெளியாகும் என்று தற்போதைய தகவல்கள் தெரிவிக்கின்றன. இதைத்தொடர்ந்து நடிகர் சூர்யா, வெற்றிமாறன் இயக்க இருக்கும் வாடிவாசல் திரைப்படத்தில் நடிப்பார் என்று எதிர்பார்க்கப்பட்டது. ஆனால் சமீபத்திய தகவலின்படி நடிகர் சூர்யா, வாடிவாசலுக்கு முன்பாக தனது 45 வது திரைப்படத்தில் நடிக்க இருக்கிறாராம். எனவே சூர்யா 45 திரைப்படத்தில் யார் இயக்கப் போகிறார் என்று எதிர்பார்ப்பு ரசிகர்கள் மத்தியில் இருந்து வருகிறது. அதன்படி சூர்யா 45 படத்தின் இயக்குனர் குறித்த தகவல் ரசிகர்களுக்கு சர்ப்ரைஸாக இருக்கும் என்று தகவல் வெளியானது.
இந்நிலையில் தற்போது சூர்யா 45 படத்தின் இயக்குனர் குறித்த அப்டேட் வெளியாகியிருக்கிறது. அதாவது அந்த இயக்குனர் வேறு யாரும் இல்லை ஆர் ஜே பாலாஜி என்று சினிமா வட்டாரங்கள் தெரிவிக்கின்றன. இவர்களின் கூட்டணியில் உருவாக உள்ள புதிய படத்தை ட்ரீம் வாரியர் பிக்சர்ஸ் நிறுவனம் தயாரிக்க இருப்பதாகவும் ஏ.ஆர். ரகுமான் இசையமைக்கப் போவதாகவும் சொல்லப்படுகிறது.
விரைவில் இது தொடர்பான அதிகாரப்பூர்வ அறிவிப்பு வெளியாகும் எனவும் எதிர்பார்க்கப்படுகிறது. மேலும் ஆர்ஜே பாலாஜி தமிழ் சினிமாவில் நடிகராகவும் இயக்குனராகவும் வலம் வருகிறார் என்பது குறிப்பிடத்தக்கது.