நடிகர் மாதவன் தமிழ் சினிமாவில் மட்டுமல்லாமல் இந்தி மொழி படங்களிலும் நடித்து பெயர் பெற்று வருகிறார். இதற்கிடையில் இவர் இயக்கியிருந்த ராக்கெட்ரி நம்பி விளைவு திரைப்படம் ரசிகர்கள் மத்தியில் பெரும் வரவேற்பை பெற்று பல்வேறு விருதுகளையும் அள்ளியது. 
அடுத்தது இவர் சைத்தான் எனும் திரைப்படத்தில் வில்லனாக நடித்திருந்தார். இந்த படமும் பிரம்மாண்ட வெற்றி கண்டது. தற்போது இவர் டெஸ்ட் போன்ற படங்களை கைவசம் வைத்துள்ளார். அதே சமயம் யாரடி நீ மோகினி, திருச்சிற்றம்பலம் உள்ளிட்ட படங்களை இயக்கிய மித்ரன் ஆர் ஜவகர் இயக்கத்தில் புதிய படம் ஒன்று நடித்து வருகிறார் மாதவன். இந்த படத்திற்கு அதிர்ஷ்டசாலி என்ற தலைப்பு வைக்கப்பட்டுள்ளது. இதில் மாதவனுடன் இணைந்து மடோனா செபாஸ்டின், ராதிகா சரத்குமார் உள்ளிட்டோர் முக்கிய கதாபாத்திரங்களில் நடிக்கின்றனர். இதனை AA வீடியோ கார்ப்பரேஷன் நிறுவனம் மற்றும் ஐங்கரன் நிறுவனம் ஆகியவை இணைந்து தயாரிக்க யுவன் சங்கர் ராஜா இதற்கு இசையமைக்கிறார். மேலும் கடந்த சில தினங்களுக்கு முன்னரே இந்த படத்தின் படப்பிடிப்பு இறுதிக்கட்டத்தை நெருங்கியுள்ளதாக தகவல் வெளியானது. 
இந்நிலையில் இந்த படத்தில் ஃபர்ஸ்ட் லுக் போஸ்டரை படக்குழு வெளியிட்டுள்ளது. இந்த போஸ்டரில் நடிகர் மாதவன் இரண்டு உலகங்களில் இருப்பது போன்று காண்பிக்கப்பட்டுள்ளது. மேலும் அந்த போஸ்டரில் இந்த படம் விரைவில் வெளியாகும் என குறிப்பிடப்பட்டுள்ளது. இந்த போஸ்டரும் இணையத்தில் வைரலாகி வருகிறது.