‘லிஃப்ட்’ பட இயக்குனரின் அடுத்த படத்தில் ஹரிஷ் கல்யாண்….. டைட்டில் குறித்த அப்டேட்!

ஹரிஷ் கல்யாண் நடிக்கும் புதிய படத்தின் டைட்டில் குறித்த தகவல் வெளியாகியுள்ளது.

நடிகர் ஹரிஷ் கல்யாண் தமிழ் சினிமாவில் வலம் வரும் முன்னணி இளம் நடிகர்களில் ஒருவர் ஆவார். இவரது நடிப்பில் கடந்த ஆண்டு வெளியான பார்க்கிங் திரைப்படம் மிகப்பெரிய வெற்றி படமாக அமைந்த நிலையில் அதைத்தொடர்ந்து வெளியான லப்பர் பந்து திரைப்படமும் ரசிகர்கள் மத்தியில் ஏகபோக வரவேற்பை பெற்றது. அதேசமயம் ஹரிஷ் கல்யாண் நடிப்பில் உருவாகியுள்ள டீசல், நூறு கோடி வானவில் ஆகிய படங்கள் ரிலீஸுக்கு தயாராகி வருகின்றன. மேலும் இவர், ஏ.எல். விஜய், அந்தகாரம் படத்தின் இயக்குனர் விக்னராஜன் ஆகியோரின் இயக்கத்தில் தன்னுடைய அடுத்தடுத்த படங்களில் நடிப்பதற்கு ஒப்பந்தமாகி இருக்கிறார். இதற்கிடையில் இவர், லிஃப்ட் படத்தின் இயக்குனர் வினீத் வரப்பிரசாத் இயக்கத்தில் புதிய படம் ஒன்றில் நடித்து வருகிறார். இந்த படத்தின் படப்பிடிப்பு ஏற்கனவே தொடங்கப்பட்டு விறுவிறுப்பாக நடைபெற்று வருவதாக சொல்லப்படுகிறது. அதுமட்டுமில்லாமல் இந்த படத்தில் ஹரிஷ் கல்யாண் உடன் இணைந்து ப்ரீத்தி முகுந்தன் முக்கிய கதாபாத்திரத்தில் நடிக்கிறார் என ஏற்கனவே தகவல் வெளியானது. இந்நிலையில் இந்த படத்திற்கு ‘தாஷமகான்’ என்று தலைப்பு வைக்கப்பட்டிருப்பதாக தற்போதைய தகவல்கள் தெரிவிக்கின்றன. இனிவரும் நாட்களில் அதிகாரப்பூர்வ அறிவிப்பு வெளியாகும் என நம்பப்படுகிறது.