நடிகர் வைபவ், பிரபல இயக்குனர் வெங்கட் பிரபு இயக்கத்தில் பல படங்களில் நடித்துள்ளார். அதைத் தொடர்ந்து கப்பல், மேயாத மான், லாக்கப் உள்ளிட்ட படங்களில் ஹீரோவாகவும் நடித்திருக்கிறார். அந்த வகையில் வைபவ் நடிப்பில் உருவாகியுள்ள ஆலம்பனா ரிலீசுக்கு நெருங்கி வரும் நேரத்தில் ஒரு சில காரணங்களால் படத்தின் ரிலீஸ் தேதி ஒத்தி வைக்கப்பட்டுள்ளது. படத்தின் தயாரிப்பு நிறுவனமான கே ஜே ஆர் ஸ்டுடியோஸ் நிறுவனம் புதிய ரிலீஸ் தேதியை விரைவில் அறிவிக்கும் என்று எதிர்பார்க்கப்படுகிறது.
இந்நிலையில் நடிகர் வைபவ் அடுத்தடுத்த பல படங்களில் பிசியாக நடித்து வருகிறார். சென்னை சிட்டி கேங்ஸ்டர்ஸ் என்ற புதிய படத்தில் நடிப்பதற்கு கமிட்டாகியுள்ளார். இந்த படத்தின் படப்பிடிப்பு சமீபத்தில் பூஜையுடன் தொடங்கப்பட்டு விறுவிறுப்பாக நடைபெற்று வருகிறது. இதற்கிடையே நடிகர் வைபவ், இயக்குனர் ஷெரீஃப் எழுதி இயக்கியுள்ள ரணம் எனும் கிரைம் திரில்லர் படத்தில் நடித்துள்ளார். இதனை மிதுன் மித்ரா புரொடக்ஷன்ஸ் நிறுவனம் தயாரித்துள்ள நிலையில் அரோல் கொரேல்லி இதற்கு இசையமைத்துள்ளார். 
இந்தப் படத்தில் வைபவ், தான்யா ஹோப், நந்திதா உள்ளிட்ட பலரும் நடித்துள்ளனர். படத்தின் டீசர் சில தினங்களுக்கு முன்பாக வெளியான நிலையில் இப்படம் வருகின்ற பிப்ரவரி மாதம் உலகம் முழுவதும் வெளியாக இருப்பதாக அறிவிக்கப்பட்டுள்ளது. இதற்கிடையில் படத்தில் இடம்பெற்றுள்ள பொன்னான கண்ணே எனும் முதல் பாடல் வெளியாகி நல்ல வரவேற்பு பெற்றது. 
இந்நிலையில் ரணம் படத்தின் அச்சு பெண்ணே எனும் இரண்டாவது பாடல் இன்று (பிப்ரவரி 5) மாலை 7 மணி அளவில் வெளியாக இருப்பதாக அறிவிக்கப்பட்டுள்ளது. இப்பாடலை நடிகை குஷ்பூ மற்றும் ராதிகா சரத்குமார் ஆகியோர் இணைந்து வெளியிட இருப்பதாகவும் தெரிவிக்கப்பட்டுள்ளது.