ரத்னம் படத்தை வௌியிட விடாமல் கட்டப்பஞ்சாயத்து… நடிகர் விஷால் குற்றச்சாட்டு…

கோலிவுட்டில் முன்னணி நடிகராக வலம் வருபவர் நடிகர் விஷால். அடுத்தடுத்து பல படங்களில் கமிட்டாகி நடித்து வருகிறார். செல்லமே படத்தின் மூலம் கோலிவுட் திரையுலகிற்கு அறிமுகமான அவர், சண்டக்கோழி, திமிரு, சத்யம், அவன் இவன், தாமிரபரணி, துப்பறிவாளன், உள்ளிட்ட பல படங்களில் நடித்து முன்னணி நடிகராக உயர்ந்துள்ளார். விஷால் நடிப்பில் இறுதியாக வெளியான மார்க் ஆண்டனி திரைப்படம் பெரும் வெற்றி பெற்றது.

தற்போது ஹரி இயக்கத்தில் விஷால் நடித்து முடித்துள்ள திரைப்படம் ரத்னம். இதில், விஷாலுக்கு ஜோடியாக பிரியா பவானி சங்கர் நடிக்கிறார். மேலும், கௌதம் மேனன், சமுத்திரக்கனி, மற்றும் பலர் முக்கிய கதாபாத்திரங்களில் நடித்து வருகின்றனர். இப்படத்தின் படப்பிடிப்பு நிறைவு பெற்று, படத்தின் பின்னணி வேலைகள் விறுவிறுப்பாக நடைபெற்று வருகின்றன.இப்படத்தின் டீசர் மற்றும் பாடல்கள் ஏற்கனவே வெளியாகி வரவேற்பை பெற்றன.

இந்நிலையில், ரத்னம் படத்தை வெளியிட விடாமல் கட்டப்பஞ்சாயத்து செய்கிறார்கள் என்று நடிகர் விஷால் குற்றம் சாட்டியிருக்கிறார். திருச்சி, தஞ்சாவூர், பகுதிகளில் ரத்னம் படத்தை வெளியிட விடாமல் கட்டப்பஞ்சாயத்து செய்வதாக அவர் தெரிவித்துள்ளார். படத்தை முடக்குவதாக சில மர்மநபர்கள் திரையரங்க உரிமையாளர் சங்கத்தில் கடிதம் கொடுத்துள்ளதாக அவர் புகார் அளித்துள்ளார். படம் நாளை வெளியாக உள்ள நிலையில், புதிய பிரச்சனை எழுந்துள்ளது பரபரப்பை ஏற்படுத்தியிருக்கிறது.