நடிகர் ரஜினி சமீபத்தில் வேட்டையன் திரைப்படத்தில் நடித்திருந்தார். இந்த படம் கடந்த அக்டோபர் 10ஆம் தேதி உலகம் முழுவதும் வெளியாகி வசூல் ரீதியாகவும் விமர்சன ரீதியாகவும் வெற்றி பெற்று வருகிறது. 
அதே சமயம் சூப்பர் ஸ்டார் ரஜினிகாந்த், லோகேஷ் கனகராஜ் இயக்கத்தில் கூலி திரைப்படத்தில் நடித்து வருகிறார். இந்நிலையில் இன்று (அக்டோபர் 31) தீபாவளி தினத்தன்று நடிகர் ரஜினி தனது போயஸ் கார்டன் இல்லத்தில் இருந்து ரசிகர்களை சந்தித்து தீபாவளி வாழ்த்து தெரிவித்துள்ளார். அதாவது நடிகர் ரஜினி ஒவ்வொரு வருடமும் தீபாவளி தினத்தன்று தனது வீட்டிலிருந்து ரசிகர்களை சந்திப்பது வழக்கம். அந்த வகையில் இந்த வருடமும் போயஸ் கார்டன் இல்லத்தில் ரஜினியின் ரசிகர்கள் கூட்டம் கூட்டமாக வந்து நடிகர் ரஜினிகாந்தை சந்தித்து வாழ்த்து தெரிவிக்க காலையிலிருந்து காத்துக் கொண்டிருந்தனர். எனவே நடிகர் ரஜினி தனது இல்லத்தில் இருந்து வெளியே வந்து கையசைத்து பறக்கும் முத்தங்களை பறக்கவிட்டு தனது வாழ்த்துக்களை ரசிகர்களுக்கு தெரிவித்துள்ளார் ரஜினி. ரஜினி, சில நிமிடங்கள் மட்டுமே வெளியில் வந்து ரசிகர்களை சந்தித்திருந்தாலும் அந்த நிகழ்வை ரசிகர்கள் ஆரவாரம் எழுப்பி வெகு விமர்சையாக கொண்டாடி தீர்த்து வருகின்றனர்.
அதைத்தொடர்ந்து செய்தியாளர்களை சந்தித்த ரஜினி, அனைவருக்கும் தீபாவளி வாழ்த்துக்கள் தெரிவித்துள்ளார். மேலும் தீபாவளி தினத்தில் அனைவரும் சந்தோஷமாகவும் ஆரோக்கியமாகவும் இருக்க வேண்டும் என்று பேசியுள்ளார். அதுமட்டுமில்லாமல் மாநாடு நடத்திய நடிகர் விஜய் வெற்றிகரமாக மாநாட்டை நடத்தி இருப்பதாகவும் வாழ்த்து கூறியுள்ளார் ரஜினி. அடுத்தது ரசிகர்களும் உடல் நிலை பாதிக்கப்பட்டு இருந்த ரஜினிகாந்தை நேரில் சந்தித்து வாழ்த்து கூறியது தங்களுக்கு மகிழ்ச்சி அளிப்பதாகவும் தெரிவித்துள்ளனர்.