மகாராஷ்டிரா சட்டசபை தேர்தலுக்கான வாக்குப்பதிவு நவம்பர் 20-ம் தேதி நடைபெற உள்ளது. தேர்தலுக்கு முன் அதானி தொடர்பான அரசியல் சூடுபிடித்துள்ளது. கட்சிகளின் முக்கிய தலைவர்களுக்கு இடையேயான பேச்சு வார்த்தை வலுத்துள்ளது. அஜித் பவாரின் அறிக்கையால் சர்ச்சை எழுந்தது. அமித் ஷாவும் சரத் பவாரும் டெல்லியில் அதானி முன்னிலையில் கூட்டணிக்காக சந்தித்ததாக கூறியது சர்ச்சையை ஏற்படுத்தி உள்ளது. இது குறித்து பாஜக விளக்கம் அளிக்க வேண்டும் என அஜித் பவார் பரபரப்பை கிளப்பி உள்ளார்.
ஐந்து ஆண்டுகளுக்கு முன்பு பாஜக, பிரிக்கப்படாத என்சிபி இடையே அரசியல் கூட்டணி பேச்சுவார்த்தைகளை கெளதம் அதானி ஏற்பாடு செய்தார் என்று அஜித் பவார் கூறினார். தேவேந்திர ஃபட்னாவிஸை முதல்வராகவும், தன்னை துணை முதல்வராகவும் மாற்றி பாஜக அரசு அமைப்பதற்கு முன்பு, 2019 ல் நடந்த பேச்சுவார்த்தையை இப்போது தெரிவித்துள்ளார் அஜித் பவார். அந்த பேச்சுவார்த்தையின்போது அமித் ஷா, கௌதம் அதானி, பிரபுல் படேல், தேவேந்திர ஃபட்னாவிஸ், சரத் பவார் ஆகியோர் அங்கு இருந்தனர்.
டெல்லியில் உள்ள அதானி வீட்டில் இந்த சந்திப்பு நடந்தது. அதாவது, சரத் பவாருக்கும் அமித் ஷாவுக்கும் இடையே ஒரு சந்திப்பை கெளதம் அதானி ஏற்பாடு செய்ததாகவும், மகாராஷ்டிராவில் ஆட்சி அமைக்க அவர்களுக்கு இடையே ஒப்பந்தம் செய்ததாகவும் அஜித் பவார் கூறினார்.
இவை அனைத்தும் பிரதமர் நரேந்திர மோடியின் உத்தரவின் பேரில் நடந்ததாக காங்கிரஸ் தலைவர் ராகுல் காந்தி குற்றம் சாட்டியுள்ளார். அரசாங்கத்தை கவிழ்க்க அதானியை பயன்படுத்தி ஆட்சியை கவிழ்க்க பாஜக அரசியல் கூட்டங்களை நடத்தியுள்ளது. இந்த கூட்டத்தில் தொழிலதிபர் கவுதம் அதானிக்கு என்ன வேலை? அதானிக்கு தாராவியில் இடம் வேண்டும், அதன் மூலம் ரூ.1 லட்சம் கோடி லாபம் கிடைக்கும். அதற்காகத்தான் மகாராஷ்டிராவில் மகா விகாஸ் அகாடி அரசு கவிழ்ந்தது.
2019 நவம்பரில் புதுதில்லியில் பாஜக-என்சிபி கூட்டம் நடைபெற்றதாக கூறிய மகாராஷ்டிர துணை முதல்வர் தேவேந்திர ஃபட்னாவிஸ், ‘‘இந்த கூட்டத்தில் தொழிலதிபர் கவுதம் அதானி கலந்து கொள்ளவில்லை. ஆனால் சரத் பவார் உடனிருந்தார். சரத் பவார் எனக்கு துரோகம் செய்து விட்டார். சந்திப்பு நடந்தது, ஆனால் அது அதானியின் இல்லத்தில் இல்லை. அவர் அங்கு வரவில்லை. என்னைத் தவிர உள்துறை அமைச்சர் அமித் ஷா, சரத் பவார், பிரபுல் படேல், அஜித் பவார் ஆகியோர் கூட்டத்தில் கலந்து கொண்டனர்.
அரசு அமைப்பது, துறைகள் ஒதுக்கீடு, பாதுகாவலர் அமைச்சர்கள் நியமனம் குறித்து விவாதம் நடந்தது. திட்டத்தை செயல்படுத்தும் பொறுப்பு என்னிடமும் அஜித் பவாரிடமும் ஒப்படைக்கப்பட்டது. திட்டம் செயல்படுத்தப்படும் நிலையில், ஷரத் பவார் அமைதியாக அந்த இடத்தை விட்டு சென்றார். பவார் இப்படி பின்வாங்குவார் என்று நாங்கள் எதிர்பார்க்கவே இல்லை’’ எனத் தெரிவித்துள்ளார்.
இது குறித்து என்சிபி (எஸ்பி) தலைவர் சரத் பவாரும் தனது விளக்கத்தை அளித்துள்ளார். ‘‘அதானியின் புதுடெல்லி இல்லத்தில் இந்த சந்திப்பு நடைபெற்றது உண்மை. அதானி விருந்து அளித்தார், ஆனால் அரசியல் விவாதங்களில் பங்கேற்கவில்லை. அவரைத் தவிர அதானி, அமித் ஷா, அஜித் பவார் ஆகியோரும் கலந்து கொண்டனர். அஜீத் பவார் துணை முதல்வராக பதவியேற்கும் முன், தேவேந்திர ஃபட்னாவிஸ் முதல்வராக பதவியேற்பதற்கு முன்னதாக இந்த சந்திப்பு அன்று காலை நடைபெற்றது. பல என்சிபி தலைவர்கள் வீட்டில் சோதனை நடைபெற்றது. பா.ஜ.,வுடன் கைகோர்த்தால், பிரச்னை முடிவுக்கு வரும் என உறுதி அளித்தனர். ஆனால், பாஜக வாக்குறுதியைக் காப்பாற்றும் என்பதில் உறுதியாக இல்லாததால் தான் நான் பின்வாங்கினேன்’’ எனத் தெரிவித்துள்ளார்.