நடிகர் சூர்யா தற்போது சிறுத்தை சிவா இயக்கத்தில் கங்குவா திரைப்படத்தில் நடித்து வருகிறார். இந்தப் படத்தில் சூர்யாவுடன் இணைந்து திஷா பதானி, கோவை சரளா, யோகி பாபு, அவினாஷ் உள்ளிட்டோர் நடிக்கின்றனர். இப்படத்தை ஞானவேல் ராஜா ஸ்டுடியோ கிரீன் நிறுவனத்தின் சார்பில் தயாரிக்கிறார். சிங்கம் 2 படத்திற்கு பிறகு தேவி ஸ்ரீ பிரசாத் சூர்யா நடிப்பில் உருவாகி வரும் இந்த படத்திற்கு இசையமைக்கிறார்.
இப்படம் மிகப் பிரம்மாண்டமாக சுமார் 300 கோடி ரூபாய் பட்ஜெட்டில் ஒரு வரலாற்று சரித்திர திரைப்படமாக உருவாகி வருகிறது. மேலும் இப்படம் 3D அனிமேஷன் தொழில்நுட்பத்தில் தயாராகி வருகிறது. படத்தின் படப்பிடிப்புகள் சென்னை மற்றும் கொடைக்கானல் பகுதிகளில் விறுவிறுப்பாக நடைபெற்று வருகின்றன. இதைத் தொடர்ந்து படத்தின் கிராபிக்ஸ் பணிகள் முடிக்க நீண்ட நாட்கள் தேவைப்படுவதால் இப்படம் அடுத்த ஆண்டு ஏப்ரல் மாதத்தில் 10 மொழிகளில் வெளியாக இருப்பதாகவும் கூறப்படுகிறது.
மேலும் இந்த படம் குறித்த மற்ற தகவல்கள் வருகின்ற ஜூலை 23ஆம் தேதி அன்று சூர்யாவின் பிறந்த நாளில் வெளியிடப்படும் என்று ரசிகர்கள் மிகுந்த எதிர்பார்ப்பில் உள்ளனர். அதன்படி இந்த படத்தின் ப்ரோமோவை வருகின்ற ஜூலை 22ஆம் தேதி சூர்யாவின் பிறந்தநாளுக்கு முதல் நாளே ரசிகர்களுக்கு ட்ரீட் கொடுக்கும் விதமாக வெளியிட படக்குழுவினர் திட்டமிட்டுள்ளதாக தற்போதைய தகவல்கள் தெரிவிக்கின்றன.
அதுமட்டுமில்லாமல் ஜூலை 18ஆம் தேதியே சூர்யாவின் போர்ஷன் முடிந்து விடும் என்றும் மற்றொரு புதிய தகவல் கிடைத்துள்ளது. ஆதலால் இந்த படத்தின் ப்ரோமோ விரைவில் வெளியாகலாம் என்று எதிர்பார்க்கப்படுகிறது.