நகைச்சுவை நடிகரான சதீஷ் தற்போது கதாநாயகனாகவும் பல படங்களில் நடித்து வருகிறார். அந்த வகையில் கடந்த 2022 ஆம் ஆண்டு ஜனவரி மாதத்தில் சதீஷ் ஹீரோவாக நடித்து வெளியான திரைப்படம் நாய் சேகர். இப்படத்தை தொடர்ந்து சமீபத்தில் கான்ஜுரிங் கண்ணப்பன் எனும் திரைப்படத்தில் சதீஷ் நடித்துள்ளார். இப்படத்தில் சதீஷ் உடன் இணைந்து சரண்யா, ஆனந்தராஜ், நாசர் உள்ளிட்ட பலர் நடித்துள்ளனர். இப்படம் கடந்த டிசம்பர் 8ம் தேதி வெளியான நிலையில் ரசிகர்கள் மத்தியில் வசூல் ரீதியாகவும் விமர்சன ரீதியாகவும் நல்ல வரவேற்பை பெற்று வருகிறது.
இதற்கிடையில் நடிகர் சதீஷ், வித்தைக்காரன் எனும் திரைப்படத்திலும் ஹீரோவாக நடித்துள்ளார். வெங்கி இயக்கத்தில் இப்படம் உருவாகியுள்ளது. இந்த படத்தின் படப்பிடிப்புகள் விறுவிறுப்பாக நடைபெற்ற நிலையில் முழுவதும் நிறைவடைந்துள்ளதாக படக்குழுவினர் ஏற்கனவே அறிவித்திருந்தனர். 
அதேசமயம் இந்த படத்தின் டீசரும் அதைத் தொடர்ந்து முதல் பாடலும் வெளியாகி கவனம் பெற்றது. இந்நிலையில் இப்படம் பிப்ரவரி மாதத்தில் வெளியாக இருப்பதாக படக்குழுவினர் போஸ்டர் ஒன்றை வெளியிட்டு அதிகாரப்பூர்வமாக அறிவித்துள்ளனர்.
மேலும் இந்த படத்தை ஒயிட் கார்பெட் ஃபிலிம்ஸ் நிறுவனம் தயாரிக்க வி.பி.ஆர் இசையமைத்துள்ளார். இப்படத்தில் சிம்ரன் குப்தா, ஆனந்தராஜ், ஜான் விஜய், ரமேஷ் திலக், தங்கதுரை உள்ளிட்ட ஒரு முக்கிய கதாபாத்திரங்களில் நடித்துள்ளனர் என்பது குறிப்பிடத்தக்கது.