அஜித் நடிக்கும் குட் பேட் அக்லி படத்தின் ஐதராபாத் படப்பிடிப்பு நிறைவடைந்துள்ளது.
நடிகர் அஜித் துணிவு படத்திற்கு பிறகு விடாமுயற்சி திரைப்படத்தில் நடித்து வருகிறார். இந்தப் படத்தில் பாடல் காட்சி ஒன்றைத் தவிர இறுதி கட்ட படப்பிடிப்பு நிறைவடைந்த நிலையில் விரைவில் மொத்த படப்பிடிப்பும் நிறைவடைய இருக்கிறது. அதேசமயம் நடிகர் அஜித், ஆதிக் ரவிச்சந்திரன் இயக்கத்தில் தனது 63வது திரைப்படத்தில் நடித்து வருகிறார். இந்த படத்திற்கு குட் பேட் அக்லி என்று தலைப்பு வைக்கப்பட்டுள்ளது. படத்தை மைத்ரி மூவி மேக்கர்ஸ் நிறுவனம் தயாரிக்க தேவி ஸ்ரீ பிரசாத் இதற்கு இசை அமைக்கிறார். இந்த படத்தில் அஜித்துக்கு ஜோடியாக நடிகை திரிஷா நடிக்கிறார் என்று தகவல் வெளியாகி வருகின்றன. இருப்பினும் அதிகாரப்பூர்வ அறிவிப்பு இனிவரும் நாட்களில் வெளியாகும் என்று எதிர்பார்க்கப்படுகிறது. இந்த படத்தின் முதல் கட்ட படப்பிடிப்பு கடந்த மே மாதம் ஐதராபாத்தில் தொடங்கி விறுவிறுப்பாக நடைபெற்று முடிந்தது. பின்னர் சிறிய இடைவெளிக்கு பிறகு மீண்டும் ஐதராபாத்தில் படப்பிடிப்பு தொடங்கப்பட்ட நிலையில் தற்போது நிறைவடைந்துள்ளது.
அதன்படி பாடல் காட்சி ஒன்றுடன் இரண்டாம் கட்ட படப்பிடிப்பு நிறைவடைந்ததாக சொல்லப்படுகிறது. இதைத்தொடர்ந்து இதன் அடுத்த கட்ட படப்பிடிப்பு ஸ்பெயின் நாட்டில் நடைபெறும் என்று தற்போதைய தகவல்கள் தெரிவிக்கின்றன. மேலும் இயக்குனர் ஆதிக் ரவிச்சந்திரன் உடன் உதவி இயக்குனர் ஹரிஷ் மணிகண்டன் மற்றும் நடன கலைஞர் அசார் ஆகியோர் இருக்கும் புகைப்படம் இணையத்தில் வைரலாகி வருகிறது.