தனுஷ் தற்போது தமிழ் சினிமாவின் தவிர்க்க முடியாத நடிகராக வலம் வருகிறார். அதே சமயம் ஒரு சிறந்த நடிகராக மட்டுமல்லாமல் இயக்குனராகவும் பாடல் ஆசிரியராகவும் பாடகராகவும் தனது திறமைகளை வெளிக்காட்டி வருகிறார். அந்த வகையில் பல ஹிட் பாடல்களை பாடியுள்ள தனுஷ் கடந்த 2017 இல் ப. பாண்டி என்னும் திரைப்படத்தை இயக்கியிருந்தார். இந்த படம் ரசிகர்கள் மத்தியில் பெரும் வரவேற்பை பெற்ற நிலையில், தற்போது தனது 50வது படத்தையும் தானே இயக்கி நடித்துள்ளார். தற்காலிகமாக D50 என்று தலைப்பு வைக்கப்பட்டுள்ள இந்த படத்தை சன் பிக்சர்ஸ் நிறுவனத்தின் சார்பில் கலாநிதிமாறன் தயாரிக்கிறார். 
இந்த படத்தில் தனுஷ் உடன் இணைந்து அபர்ணா பால முரளி, நித்யா மேனன், அனிகா சுரேந்திரன், சந்திப் கிஷன், எஸ் ஜே சூர்யா, காளிதாஸ் ஜெயராம், விஷ்ணு விஷால், துஷாரா விஜயன் உள்ளிட்ட பலர் நடிக்கின்றனர். இந்த படத்தின் படப்பிடிப்புகள் சில மாதங்களுக்கு முன்பாக தொடங்கி விறுவிறுப்பாக நடைபெற்று முடிந்துள்ளது. மேலும் இந்த படம் வட சென்னையில் நடக்கும் சம்பவங்களை பின்னணியாக கொண்டு மாஸான கேங்ஸ்டர் படமாக உருவாகியுள்ளது. அதேசமயம் இந்த படத்திற்கு ராயன் என்று தலைப்பிடப்பட்டுள்ளதாகவும் தகவல்கள் கசிந்துள்ளது.
இந்நிலையில் D50 படத்தின் பர்ஸ்ட் லுக் போஸ்டர் வருகின்ற பிப்ரவரி 19ஆம் தேதி வெளியாக இருப்பதாக போஸ்டர் ஒன்றை வெளியிட்டு பட குழுவினர் அதிகாரப்பூர்வமாக அறிவித்துள்ளனர். இந்த தகவல் தனுஷ் ரசிகர்களுக்கு மிகுந்த உற்சாகத்தை தந்துள்ளது.
D50 படத்தை தொடர்ந்து தனுஷ் நிலவுக்கு என் மேல் என்னடி கோபம் என்ற திரைப்படத்தையும் இயக்கி வருகிறார் என்பது குறிப்பிடத்தக்கது.