நடிகர் கமல்ஹாசன், விக்ரம் படத்திற்கு பிறகு இந்தியன் 2, கல்கி 2898AD போன்ற படங்களை கைவசம் வைத்துள்ளார். 
அதேசமயம் கமல்ஹாசன் நீண்ட இடைவெளிக்கு பிறகு மணிரத்னம் இயக்கத்தில் உருவாகி வரும் தக் லைஃப் திரைப்படத்தில் நடித்து வருகிறார். இந்த படத்தில் கமலுடன் இணைந்து ஜெயம் ரவி, திரிஷா, துல்கர் சல்மான், சிம்பு, கௌதம் கார்த்திக் உள்ளிட்ட பல நட்சத்திரங்கள் நடிக்கின்றனர். இந்தப் படத்தை கமல்ஹாசனின் ராஜ்கமல் பிலிம்ஸ் இன்டர்நேஷனல் நிறுவனம் தயாரிக்க ஏ ஆர் ரகுமான் இதற்கு இசை அமைக்கிறார். இப்படமானது ஆக்சன் காட்சிகள் நிறைந்த படமாக தயாராகி வருகிறது. இந்த படத்தின் படப்பிடிப்பு கடந்த சில மாதங்களுக்கு முன்பாகவே தொடங்கப்பட்டு முதற்கட்ட படப்பிடிப்புகள் நிறைவடைந்தன. அதைத் தொடர்ந்து இந்த படத்தின் அடுத்த கட்ட படப்பிடிப்புகள் தற்போது டெல்லியில் நடைபெற்று வரும் நிலையில் கமல்ஹாசன் இந்த படப்பிடிப்பில் பங்கேற்றுள்ளார். 
மேலும் இந்த படத்தில் இரு பாலிவுட் பிரபலங்களும் இணைந்துள்ளதாக தகவல் கிடைத்துள்ளது. அதன்படி அலி ஃபசல் மற்றும் பங்கஜ் திரிபாதி உள்ளிட்டோர் முக்கிய கதாபாத்திரங்களில் நடிக்க உள்ளனர். தற்போது கமல்ஹாசன், அலி ஃபசல், சிம்பு ஆகியோரின் காட்சிகள் படமாக்கப்பட்டு வருவதாகவும் சொல்லப்படுகிறது. மேலும் படம் தொடர்பான அடுத்தடுத்த அப்டேட்டுகள் விரைவில் வெளியாகும் என்று எதிர்பார்க்கப்படுகிறது.