வெற்றிமாறன் இயக்கத்தில் சூரி, விஜய் சேதுபதி ஆகியோர் முன்னணி கதாபாத்திரங்களாக நடித்து ரசிகர்களிடம் மாபெரும் வரவேற்பைப் பெற்ற திரைப்படம் விடுதலை. மலைவாழ் மக்களுக்காக போராடும் வாத்தியாராக விஜய் சேதுபதியும், நேர்மையான கடைநிலை போலீசாக சூரியும் நடித்திருந்தனர். 
விடுதலை பாகம் 1 படத்தின் கிளைமாக்ஸ் கட்சியில் சூரி ,விஜய் சேதுபதியைப் பிடித்து காவல் நிலையத்தில் ஒப்படைப்பது போல முடிவடைந்து இருந்தது. விடுதலை 2 படத்தின் சில முன்னோட்ட காட்சிகளும் முதல் பாகத்தின் கிளைமாக்ஸ்-ல் இடம்பெற்று இருந்தன. இவை அனைத்துமே இரண்டாம் பாகத்துக்கான எதிர்பார்ப்பை அதிகரித்திருந்தன. இந்நிலையில் விறுவிறுப்பாக நடைபெற்று வந்த விடுதலை 2 படப்பிடிப்புகள் முடிந்து 2024 ஆம் ஆண்டின் ஜனவரி 26 இல் வெளியாகும் என எதிர்பார்க்கப்பட்டது. ஆனால் படப்பிடிப்பு முடியாததால் படம் தள்ளிப் போகும் என்ற செய்திகள் வெளியாகி உள்ளன. இதற்கான காரணம் குறித்து வெற்றிமாறன் கூறுகையில், “விடுதலை 2 படத்தில் கிளைமாக்ஸ் காட்சி ஒரு அடர்பனி சூழ்ந்த களத்தில் நடப்பது போல திட்டமிட்டோம். இதற்காக கிட்டத்தட்ட நூறு நாட்களாக உண்மையிலேயே மூடு பனியில் படம் பிடித்தோம். 
அதன் பின் தான் உணர்ந்தோம், உண்மையான மூடுபனியில் இக்காட்சியை எடுத்து முடிக்க நாங்கள் 4 வருடங்களை செலவழிக்க வேண்டி இருக்கும். இதனால் கம்ப்யூட்டர் கிராபிக்ஸ் மூலம் பனியை உருவாக்க திட்டமிட்டோம். படத்தில் விஜய் சேதுபதி வரும் ஒரே ஒரு ஃப்ளாஷ் பேக் காட்சி மட்டுமே முடிக்க வேண்டியுள்ளது. மற்ற அனைத்து காட்சிகளும் படமாக்கப்பட்டு விட்டன”என்றும் அவர் தெரிவித்துள்ளார்.