கடந்த ஆகஸ்ட் 15ஆம் தேதி சுதந்திர தினத்தை முன்னிட்டு விக்ரமின் தங்கலான், அருள்நிதியின் டிமான்ட்டி காலனி 2 என பெரிய படங்கள் மிகுந்த எதிர்பார்ப்புகளுடன் வெளியிடப்பட்டது. 
அதில் விக்ரம் நடிப்பில் வெளியான தங்கலான் திரைப்படம் கோலார் தங்க வயலில் தங்கம் கண்டறியப்படுவது குறித்து பேசி இருக்கிறது. இந்த படம் கலையான விமர்சனங்களை பெற்று வரும் நிலையில் அதே நாளில் வெளியான டிமான்ட்டி காலனி 2 திரைப்படத்திற்கு ரசிகர்களின் ஆதரவு அதிகரித்து வருகிறது.
கடந்த 2015 ஆம் ஆண்டு அஜய் ஞானமுத்து இயக்கத்தில் வெளியான டிமான்ட்டி காலனி திரைப்படம் மிகப்பெரிய வெற்றி கண்டதால் இதன் இரண்டாவது பாகம் எப்படி இருக்கும் என்பதை காண ரசிகர்கள் ஆவலுடன் காத்துக் கொண்டிருந்தனர். அதன்படி ஹாரர் திரில்லர் கதை களத்தில் வெளியான இந்த படம் குடும்பங்கள் கொண்டாடும் விதமாக அமைந்து வெற்றி நடை போட்டு வருகிறது. 
அதே சமயம் டிமான்ட்டி காலனி 2 படத்திற்காக கூடுதல் திரையரங்குகளும் ஒதுக்கப்பட்டுள்ள நிலையில் பல திரையரங்குகளில் இப்படம் ஹவுஸ் புல்லாக ஓடிக்கொண்டிருக்கிறது. எனவே இந்நிலையில் இந்த படம் 4 நாட்களில் 15 கோடிக்கு மேல் வசூல் செய்துள்ளதாக தற்போதைய தகவல்கள் தெரிவிக்கின்றன. எனவே இனிவரும் நாட்களிலும் இந்த படத்தின் வசூல் அதிகரிக்கும் என்று நம்பப்படுகிறது.