நடிகர் தனுஷ் தானே இயக்கி புதிய படத்தில் நடிக்க இருப்பதாக சினிமா வட்டாரங்கள் தெரிவிக்கின்றன.
தனுஷ் தற்போது அருண் மாதேஸ்வரன் இயக்கத்தில் ‘கேப்டன் மில்லர்’ படத்தில் நடித்து வருகிறார். பிரியங்கா மோகன் இந்தப் படத்தில் கதாநாயகியாக நடித்து வருகிறார். தனுஷ் இதுவரை காணப்படாத புதிய கெட்டப்பில் இந்தப் படத்தில் நடித்து வருகிறார். இந்தப் படத்திற்கு இந்திய அளவில் பெரும் எதிர்பார்ப்பு நிலவி வருகிறது.
இந்தப் படத்தை அடுத்து சன் பிக்சர்ஸ் நிறுவனத்தின் தயாரிப்பில் தனுஷ் புதிய படம் நடிக்க இருப்பதாக அறிவிப்பு வெளியானது. ஆனால் படத்தின் இயக்குனர் யார், மற்ற நடிகர்கள் உள்ளிட்ட விவரங்கள் வெளியாகவில்லை.
இந்நிலையில் தனுஷ் தனது 50-வது படத்தை தானே இயக்க இருப்பதாகக் கூறப்படுகிறது. ‘பவர் பாண்டி’ படத்தின் மூலம் தனுஷ் இயக்குனராக அறிமுகமானார். அந்தப் படத்திற்கு நல்ல வரவேற்பு கிடைத்தது.
தற்போது அவர் மீண்டும் இயக்குனராக களம் இறங்க இருப்பதாகவும் இந்தப் புதிய படம் 100 கோடி பட்ஜெட்டில் பிரம்மாண்டமாக உருவாக இருப்பதாகவும் சினிமா வட்டாரங்கள் தெரிவிக்கின்றன.
ஹாலிவுட் வரை சென்று வந்திருக்கிறார் தனுஷ். அவர் படம் இயக்கினால் ஹாலிவுட் தரத்தில் தான் எடுப்பார் என்று சினிமா வட்டாரங்கள் பேசிக் கொள்கின்றன.