தனுஷின் குபேரா படம் குறித்த லேட்டஸ்ட் அப்டேட் வெளியாகியுள்ளது.
நடிகர் தனுஷ் தனது 50வது படமான ராயன் படத்தை முடித்துவிட்டு தனது 52வது படம் இட்லி கடை எனும் திரைப்படத்தை தானே இயக்கி, நடித்து முடித்துள்ளார். இந்த படம் 2025 ஏப்ரல் 10 அன்று திரைக்கு வர தயாராகி வருகிறது. அதே சமயம் நடிகர் தனுஷ், தேரே இஷ்க் மெய்ன், D55 ஆகிய அடுத்தடுத்த படங்களில் நடிப்பதற்கு கமிட் ஆகியுள்ளார். இதற்கிடையில் இவர், பிரபல தெலுங்கு இயக்குனர் சேகர் கம்முலா இயக்கத்தில் குபேரா எனும் திரைப்படத்தில் நடித்திருக்கிறார். இந்த படம் தனுஷின் 51வது படமாகும். இந்தப் படத்தை ஸ்ரீ வெங்கடேஸ்வரா சினிமாஸ் நிறுவனம் தயாரிக்க தேவி ஸ்ரீ பிரசாத் இதற்கு இசையமைக்கிறார். 
இப்படத்தில் தனுஷ் உடன் இணைந்து நாகார்ஜுனா, ராஷ்மிகா மந்தனா மற்றும் பலர் நடித்திருக்கின்றனர். பிரம்மாண்ட பட்ஜெட்டில் உருவாகி வரும் இந்த படமானது மும்பை தாராவியை மையமாக வைத்து உருவாகி வருவதாக சொல்லப்படுகிறது. அதன்படி இந்த படத்தின் படப்பிடிப்புகள் ஏற்கனவே மும்பை, ஐதராபாத் போன்ற பகுதிகளில் விறுவிறுப்பாக நடந்து வந்த நிலையில் தற்போதைய இப்படத்தின் பின்னணி வேலைகள் நடைபெற்று வருகிறது. இதற்கிடையில் இந்த படத்தில் இருந்து அடுத்தடுத்த போஸ்டர்களும் கிளிம்ப்ஸ் வீடியோவும் வெளியாகி ரசிகர்களை கவர்ந்து வருகின்றன. 
மேலும் இந்த படமானது 2025 ஜூன் மாதம் திரைக்கு வரும் என எதிர்பார்க்கப்படுகிறது. இந்நிலையில் குபேரா திரைப்படம் அரசியல் திரில்லர் ஜானரில் உருவாகி இருப்பதாக புதிய அப்டேட் கிடைத்துள்ளது. ஏற்கனவே தனுஷ் நடிப்பில் வெளியான கொடி திரைப்படம் அரசியல் திரில்லர் கதைக்களத்தில் வெளியாகி ரசிகர்களிடம் நல்ல வரவேற்பை பெற்ற நிலையில் குபேரா படத்தின் மீதான எதிர்பார்ப்பும் அதிகமாகியுள்ளது.