நடிகர் விக்ரமின் மகன் துருவ் விக்ரம் கடந்த 2019 ஆம் ஆண்டு வெளியான ஆதித்ய வர்மா என்ற படத்தின் மூலம் கதாநாயகனாக தமிழ் சினிமாவில் அறிமுகமானார். அதை தொடர்ந்து விக்ரமுடன் இணைந்து மகான் என்ற திரைப்படத்தில் நடித்திருந்தார். இதன் பிறகு துருவ் விக்ரமுக்கு பெரிய அளவில் பட வாய்ப்புகள் எதுவும் கிடைக்கவில்லை. இந்நிலையில் துருவ் விக்ரம் தனது மூன்றாவது படத்தை பிரபல இயக்குனர் மாரி செல்வராஜ் இயக்கத்தில் நடிக்க இருக்கிறார். அதன்படி மாரி செல்வராஜ், துருவ் விக்ரம் கூட்டணியில் உருவாக உள்ள புதிய படத்தை பா. ரஞ்சித் தனது நீலம் ஸ்டுடியோஸ் நிறுவனத்தின் சார்பில் தயாரிக்க உள்ளார். 
அதே சமயம் இந்த படம் பிரபல கபடி விளையாட்டு வீரர் மனத்தி பி கணேஷ் அவர்களின் வாழ்க்கை வரலாற்றை தழுவி உருவாக்கப்பட இருக்கிறது. இந்த படம் தொடர்பான அறிவிப்பு ஏற்கனவே வெளியான நிலையில் படப்பிடிப்பு சம்பந்தமான எந்த தகவலும் வெளியாகவில்லை. சமீபத்தில் இந்த படத்தின் படப்பிடிப்பு 2024 மார்ச் மாதத்தில் தொடங்க இருப்பதாக நம்பத் தகுந்த வட்டாரங்கள் தெரிவித்திருந்தன. அதன்படி துருவ் விக்ரமின் மூன்றாவது படத்தின் படப்பிடிப்பு மார்ச் 15ஆம் தேதி தூத்துக்குடியில் தொடங்க இருப்பதாகவும், அங்கு 70 முதல் 80 நாட்கள் படப்பிடிப்பு நடைபெற இருப்பதாகவும் தகவல் கிடைத்துள்ளது. மேலும் இதன் கூடுதல் தகவலாக இந்த படத்திற்கு எழிலரசு ஒளிப்பதிவு செய்ய கமிட் ஆகியுள்ளார் என்று கூறப்படுகிறது.