பிரபல இயக்குனர் வெற்றிமாறன் அசுரன், விடுதலை போன்ற வெற்றி படங்களின் மூலம் ரசிகர்கள் மனதில் நீங்கா இடம் பிடித்தவர். 
தற்போது இவர் விடுதலை 2 திரைப்படத்தை இயக்கி வருகிறார். அடுத்ததாக சூர்யா நடிப்பில் வாடிவாசல் எனும் திரைப்படத்தை இயக்க உள்ளார். வி கிரியேஷன் நிறுவனத்தின் சார்பில் கலைப்புலி எஸ் தானு இந்த படத்தை தயாரிக்கிறார். சூர்யா, வெற்றிமாறன் கூட்டணியில் உருவாக உள்ள வாடிவாசல் படத்தின் மீதான எதிர்பார்ப்பு ஆரம்பத்தில் இருந்தே அதிகமாக இருந்து வருகிறது. அதே சமயம் இந்த படத்தில் சூர்யாவுடன் இணைந்து நடிகரும் இயக்குனருமான அமீர் முக்கிய கதாபாத்திரத்தில் நடிக்க உள்ளார். சில வருடங்களுக்கு முன்பாகவே இந்த படம் தொடர்பான அறிவிப்பு வெளியான நிலையில் நடிகர் சூர்யா காளையை அடக்கும் பயிற்சிகளையும் மேற்கொண்டார். அதைத் தொடர்ந்து விரைவில் படப்பிடிப்பு தொடங்கப்படும் என்று சொல்லப்பட்டு வந்தது. ஆனால் ஒரு சில காரணங்களால் படத்தின் படப்பிடிப்பு இன்னும் தொடங்கப்படாமல் இருக்கிறது. இந்நிலையில் பிரபல இயக்குனர் மிஸ்கின்,வாடிவாசல் திரைப்படம் குறித்து சமீபத்தில் நடந்த நிகழ்ச்சி ஒன்றில் பேசியிருக்கிறார். 
அதன்படி அவர் பேசியதாவது, “வெற்றிமாறன் என்னுடைய நண்பன். நான் வாடிவாசல் திரைப்படம் குறித்து அவரிடம் கேட்டபோது அந்த படத்தின் ஸ்கிரிப்ட்டை என்னிடம் விவரித்தார். வாடிவாசல் திரைப்படம் இந்திய சினிமாவின் மற்றொரு மாபெரும் படைப்பாக அமையும். சூர்யா அசாதாரணமான நடிகர் . வாடிவாசல் படத்திற்கு பிறகு அவர் லெஜெண்டாக மாறிவிடுவார்” என்று பேசியுள்ளார்.