நடிப்பு அரக்கன் என்று ரசிகர்களால் கொண்டாடப்படும் பகத் பாசில் பாலிவுட் சினிமாவில் அறிமுகமாக இருக்கிறார் என்று புதிய தகவல் வெளிவந்துள்ளது.
நடிகர் பகத் பாசில் மலையாள சினிமாவில் முன்னணி நடிகராக வலம் வருபவர். அதேசமயம் இவர் கேரளாவில் மட்டுமல்லாமல் தமிழிலும் ஏகப்பட்ட ரசிகர்களை சேகரித்து வைத்துள்ளார். தமிழில் வேலைக்காரன், மாமன்னன் போன்ற படங்களில் வில்லனாக மிரட்டி இருந்தார் பகத் பாசில். இதற்கிடையில் விக்ரம், புஷ்பா போன்ற படங்களிலும் நடித்து பெயர் பெற்றுள்ளார். அடுத்ததாக ரஜினி நடிப்பில் உருவாகி வரும் வேட்டையன் திரைப்படத்திலும், புஷ்பா 2 திரைப்படத்தில் முக்கிய கதாபாத்திரத்தில் நடித்து வருகிறார். இவ்வாறு பல படங்களை கைவசம் வைத்துள்ள பகத் பாசில் ஏற்கனவே தமிழ், மலையாளம், தெலுங்கு என அனைத்து மொழிகளிலும் கலக்கி வரும் நிலையில் அடுத்ததாக இந்தி மொழியிலும் நடிக்க இருக்கிறார். அந்த வகையில் பகத் பாசில் பாலிவுட்டில் அறிமுகமாக உள்ள புதிய படத்தை பிரபல இயக்குனர் இம்தியாஸ் அலி இயக்க இருக்கிறாராம். இது தொடர்பான பேச்சுவார்த்தை கடந்த சில மாதங்களாக மிக தீவிரமாக நடைபெற்று வருவதாகவும் பகத் பாசில் இம்தியாஸ் அலியுடன் இணைந்து பணியாற்ற விரும்புவதாகவும் சொல்லப்படுகிறது.
இயக்குனர் இம்தியாஸ் அலி, ராக்ஸ்டார், தமாசா, ஹைவே போன்ற படங்களை இயக்கியதன் மூலம் ரசிகர்கள் மத்தியில் பிரபலமானவர் என்பது குறிப்பிடத்தக்கது. எனவே பகத் பாசில், இம்தியாஸ் அலி கூட்டணியில் உருவாக இருக்கும் புதிய படத்தின் மீதான எதிர்பார்ப்பு மிகப்பெரிய அளவில் இருந்து வருகிறது. இருப்பினும் இனிவரும் நாட்களில் இது தொடர்பான மற்ற அப்டேட்டுகள் வெளியாகும் என்று எதிர்பார்க்கப்படுகிறது.