கமல்ஹாசன் நடிப்பில் கடந்த 1996 இல் வெளியான திரைப்படம் இந்தியன். இந்த படத்தை பிரம்மாண்ட இயக்குனர் என்றழைக்கப்படும் சங்கர் இயக்கியிருந்தார். 
இந்த படம் தமிழ் சினிமாவில் பெரும் தாக்கத்தை ஏற்படுத்தி மாபெரும் வெற்றி படமாக அமைந்தது. தற்போது நீண்ட இடைவெளிக்கு பிறகு இந்தியன் படத்தின் இரண்டாம் பாகத்தை சங்கர் இயக்கியுள்ளார். இதில் கமல்ஹாசன் தவிர சித்தார்த், எஸ் ஜே சூர்யா, சமுத்திரக்கனி, பிரியா பவானி சங்கர், காஜல் அகர்வால், ரகுல் பிரீத் சிங் உள்ளிட்ட பல நட்சத்திரங்கள் நடித்துள்ளனர். இந்த படத்தை லைக்கா ப்ரொடக்ஷன்ஸ் நிறுவனத்தின் சார்பில் சுபாஷ்கரன் மற்றும் ரெட் ஜெயண்ட் மூவிஸ் நிறுவனத்தின் சார்பில் உதயநிதி ஸ்டாலின் ஆகியோரும் இணைந்து தயாரித்துள்ளனர். இந்த படத்திற்கு அனிருத் இசையமைத்துள்ளார். படத்தின் படப்பிடிப்பு கடந்த சில வருடங்களுக்கு முன்பாக தொடங்கப்பட்ட நிலையில் சமீபத்தில் நிறைவடைந்ததாக அறிவிக்கப்பட்டது. அதைத்தொடர்ந்து படத்தின் ரிலீஸ் எப்போது என்று ரசிகர்கள் பலரும் எதிர்பார்த்து காத்துக் கொண்டிருந்தனர். 
அதன்படி 2024 ஜூன் மாதத்தில் வெளியாகும் எனவும் பட குழுவினர் அறிவித்தனர். ஆனால் படத்தில் பாடல் காட்சிகள் இன்னும் படமாக்கப்பட இருப்பதாலும் வேறு சில காரணங்களாலும் இந்த படம் ஜூன் மாதத்தில் ரிலீஸ் ஆகாது என்று சமூக வலைதளங்களில் செய்திகள் பரவி வருகிறது. மேலும் 2024 ஜூலை 12 ஆம் தேதிதான் இந்தியன் 2 படத்தின் புதிய ரிலீஸ் தேதி என்றும் நம்பத் தகுந்த வட்டாரங்கள் தெரிவிக்கின்றன. ஆகவே இது தொடர்பான அதிகாரப்பூர்வ அறிவிப்பு இன்னும் சில தினங்களில் வெளியாகும் என்று எதிர்பார்க்கப்படுகிறது.