தமிழ் சினிமாவில் முன்னணி நடிகர்களில் ஒருவராக வலம் வருபவர் ராகவா லாரன்ஸ். இவர் ஒரு நடிகர் மட்டுமல்லாமல் இயக்குனர், தயாரிப்பாளர், நடன இயக்குனர் என பன்முகத் திறமைகளை கொண்டவர்.
இவரது நடிப்பில் கடைசியாக ஜிகர்தண்டா டபுள் எக்ஸ் எனும் திரைப்படம் வெளியாகி வசூல் ரீதியாகவும் விமர்சன ரீதியாகவும் மாபெரும் வெற்றி பெற்றது. அடுத்தது இவர் காஞ்சனா 4 திரைப்படத்தை தானே இயக்கி நடிக்க திட்டமிட்டு வருகிறார். மேலும் ஹண்டர், அதிகாரம், புல்லட், கால பைரவா போன்ற படங்களை கைவசம் வைத்துள்ளார் ராகவா லாரன்ஸ். இதற்கிடையில் பிரபல இயக்குனர் லோகேஷ் கனகராஜ் தயாரிக்கும் பென்ஸ் திரைப்படத்திலும் நடிப்பதற்கு ஒப்பந்தமாகியுள்ளார். இந்த படத்தினை பாக்யராஜ் கண்ணன் இயக்கப் போவதாக ஏற்கனவே அறிவிப்பு வெளியானது. மேலும் இந்த படத்தில் நடிகை பிரியங்கா அருள் மோகன் நடிக்க இருப்பதாகவும் தகவல்கள் கசிந்து வருகின்றன. 
அதுமட்டுமில்லாமல் பகத் பாசில், எஸ் ஜே சூர்யாவும் படத்தில் நடிப்பதற்கு கமிட்டாகியுள்ளதாக சொல்லப்படுகிறது. ஆனால் இது தொடர்பான எந்தவித அதிகாரப்பூர்வ அறிவிப்பும் இதுவரை வெளியாகவில்லை. இந்நிலையில் இந்த படத்தின் இசையமைப்பாளர் குறித்த தகவல் வெளியாகி உள்ளது. அதன்படி இணையத்தில் பிரபலமான கட்சி சேர எனும் பாடலுக்கு இசை அமைத்து அந்த பாடலை பாடியிருந்த சாய் அபியங்கர் தான் பென்ஸ் படத்தின் இசையமைப்பாளராக ஒப்பந்தமாகியுள்ளாராம். ஏற்கனவே பென்ஸ் படம் லோகேஷ் கனகராஜன் எல்சியு வில் இணைந்திருக்கும் நிலையில் இந்த தகவலும் ரசிகர்கள் மத்தியில் எதிர்பார்ப்பை ஏற்படுத்தி உள்ளது. இனி வரும் நாட்களில் அதிகாரப்பூர்வ அறிவிப்பு வெளியாகும் என நம்பப்படுகிறது.