கார்த்தி நடிக்கும் வா வாத்தியார் படத்தின் டீசர் வெளியாகி உள்ளது.
நடிகர் கார்த்தி பொன்னியின் செல்வன் படத்தின் பிரம்மாண்ட வெற்றிக்கு பிறகு தொடர்ந்து பல படங்களில் பிசியாக நடித்து வருகிறார். 
அந்த வகையில் கடைசியாக மெய்யழகன் திரைப்படத்தில் நடித்திருந்த நிலையில் இந்த படம் ரசிகர்கள் மத்தியில் பெரும் வரவேற்பை பெற்றது. அடுத்தது சர்தார் 2 திரைப்படத்தில் நடித்து வருகிறார் கார்த்தி. மேலும் நாளை (நவம்பர் 14) உலகம் முழுவதும் பிரம்மாண்டமாக வெளியாக இருக்கும் கங்குவா திரைப்படத்தில் வில்லனாக நடித்திருப்பதாக சொல்லப்படுகிறது. இதற்கிடையில் கார்த்தி சூது கவ்வும், காதலும் கடந்து போகும் உள்ளிட்ட படங்களை இயக்கிய நலன் குமாரசாமி இயக்கத்தில் தனது 26வது திரைப்படத்தில் நடித்திருந்தார். இந்த படத்திற்கு வா வாத்தியார் என்று தலைப்பு வைக்கப்பட்டிருக்கிறது. இந்த படத்தை ஸ்டூடியோ கிரீன் நிறுவனம் தயாரிக்க சந்தோஷ் நாராயணன் இதற்கு இசை அமைத்திருக்கிறார். ஜார்ஜ் சி வில்லியம்ஸ் இதன் ஒளிப்பதிவு பணிகளை மேற்கொண்டுள்ளார். இந்த படத்தில் கார்த்திக்கு ஜோடியாக கிரித்தி ஷெட்டி நடிக்க இவர்களுடன் இணைந்து ராஜ்கிரண், சத்யராஜ், ஆனந்தராஜ், ரமேஷ் திலக் ஆகியோர் முக்கிய கதாபாத்திரத்தில் நடித்துள்ளார். இந்த படத்தின் படப்பிடிப்புகள் ஏற்கனவே நிறைவடைந்த நிலையில் ஃபர்ஸ்ட் லுக் போஸ்டரும் வெளியாகி ரசிகர்கள் மத்தியில் கவனம் பெற்றது. அந்த போஸ்டரின் மூலம் நடிகர் கார்த்தி, இந்த படத்தில் எம்ஜிஆரின் தீவிர ரசிகராக நடித்திருக்கிறார் என்பது தெரிய வந்தது. அதை தொடர்ந்து தற்போது இந்த படத்தின் டீசரையும் படக்குழு வெளியிட்டுள்ளது.
அதாவது இந்த டீசரில் போலீஸ் கெட்டப்பில் வரும் கார்த்தி தெருவில் நடனமாடும் இளைஞர்களை கண்டிக்காமல் அவர்களுடன் இணைந்து பாடலுக்கு நடனமாடுகிறார். அந்த டீசரில் ராஜ்கிரண், ஆனந்தராஜ் ஆகியோரும் எம்ஜிஆரின் தீவிர ரசிகனாக காண்பிக்கப்பட்டுள்ளனர். அடுத்தது இந்த படம் காமெடி கதைக்களத்தில் உருவாகி இருப்பது போல் தெரிகிறது. சந்தோஷ் நாராயணனின் பின்னணி இசையும் ஒர்க் அவுட் ஆகி இருக்கிறது. தற்போது இந்த டீசர் ரசிகர்கள் மத்தியில் கவனம் பெற்று இணையத்தில் வைரலாகி வருகிறது.