பத்து தல படம் தான் எங்கள் நிறுவனத்தின் அதிக லாபம் ஈட்டிய படம் என்று ஸ்டுடியோ கிரீன் நிறுவனம் தெரிவித்துள்ளனர்.
கடந்த மார்ச் 30ஆம் தேதி சிம்பு மற்றும் கௌதம் கார்த்திக் நடிப்பில் உருவான ‘பத்து தல’ திரைப்படம் வெளியானது. படத்தில் ப்ரியா பவானி சங்கர், டிஜே அருணாச்சலம், கலையரசன், ரெடின் கிங்ஸ்லீ ஆகியோரும் நடித்திருந்தனர்.
இந்தப் படத்தை ‘சில்லுனு ஒரு காதல்’ படத்தின் இயக்குனர் கிருஷ்ணா இயக்கியிருந்தார். ஸ்டுடியோ கிரீன் நிறுவனம் மற்றும் பென் ஸ்டுடீயோஸ் நிறுவனம் இணைந்து இந்தப் படத்தை தயாரித்திருந்தனர். ஏஆர் ரகுமான் படத்திற்கு இசையமைத்திருந்தார். படத்திற்கு ரசிகர்கள் மத்தியில் நல்ல வரவேற்பு இருந்தது. சிம்பு தனி ஆளாக படத்தை சுமந்து ரசிகர்கள் மத்தியில் நல்ல வரவேற்பைப் பெற்றார்.
இந்நிலையில் சிம்புவின் கேரியரில் அதிக வருவாய் ஈட்டிய படமாக ‘பத்து தல‘ அமைந்திருப்பதாக தயாரிப்பு நிறுவனம் தெரிவித்துள்ளனர்.
இது குறித்து அவர்கள் வெளியிட்டுள்ள அறிக்கையில் ”
“எங்களின் ‘பத்து தல‘ திரைப்படம் தமிழகம் முழுவதும் 300-க்கும் மேற்பட்ட திரையரங்குகளிலும், உலகம் முழுவதும் 500 திரையரங்குகளிலும் இன்று இரண்டாவது வாரத்தில் நுழைந்துள்ளது. எங்களின் படத்திற்கு ரசிகர்களிடம் இருந்து இவ்வளவு அமோக வரவேற்பு கிடைத்திருப்பது எங்களுக்கு மிகுந்த மகிழ்ச்சியைத் தருகிறது. அதற்காக, சிலம்பரசன் (STR) ரசிகர்கள் மற்றும் பார்வையாளர்களுக்கு முழு மனதுடன் எங்களது நன்றிகளை தெரிவிக்க விரும்புகிறோம். படம் குறித்து பாராட்டி அதை உயர்த்திய விமர்சகர்கள் மற்றும் ஊடகங்களின் ஆதரவிற்கும் நன்றி தெரிவிக்க விரும்புகிறோம்.
‘பத்து தல’ திரைப்படம் சிலம்பரசனின் கரியரில் அதிக வருவாயை ஈட்டிய ஒரு படமாக மட்டுமல்லாமல், எங்களின் தயாரிப்பு நிறுவனத்திற்கும் பெரும் லாபம் தந்திருக்கக்கூடிய படமாகவும் அமைந்ததுள்ளது.
சிலம்பரசன் இந்தப் படத்தின் ஒரு முக்கிய அங்கமாக இருந்து, அவரது சிறப்பான ஆதரவைக் கொடுத்து உதவியுள்ளார். குறிப்பாக இசை வெளியீட்டு விழா மற்றும் பிற புரோமோஷன்களின் போது கலந்து கொண்டு படத்திற்கு ஒரு பெரிய கவன ஈர்ப்பைக் கொண்டு வந்து படம் பல வழிகளில் வெற்றிபெற உதவியதற்காக அவருக்கு எங்களது நன்றியை தெரிவிக்க விரும்புகிறோம்.
ஏ.ஆர்.ரஹ்மானுக்கு எங்களது சிறப்பு நன்றி. திரைப்படத்தின் இந்த மூன்று வருட பயணத்தில் தனது உற்சாகத்தைத் தக்கவைத்து, அனைத்து தரப்பு பார்வையாளர்களையும் கவரும் வகையில், தரமான கமர்ஷியல் எண்டர்டெய்னரை கொடுத்த இயக்குநர் ஓபிலி என். கிருஷ்ணா அவர்களுக்கு எங்கள் மனமார்ந்த நன்றிகள்.
முழு ஆதரவை வழங்கிய அன்பான கௌதம் கார்த்திக் அவர்களுக்கு நன்றியை தெரிவித்துக் கொள்கிறோம். படத்தின் வெற்றிக்கு சிறந்த பங்களிப்பை வழங்கிய மற்ற கலைஞர்கள் பிரியா பவானி சங்கர், கௌதம் வாசுதேவ் மேனன், கலையரசன், சந்தோஷ் பிரதாப், டீஜே அருணாச்சலம், அனு சித்தாரா, மது குருசுவாமி, ரெடின் கிங்ஸ்லி, கவிஞர் மனுஷ்யபுத்திரன், சென்றாயன், சௌந்தரராஜா மற்றும் பிறருக்கும் எங்கள் நன்றிகள்.
ஒளிப்பதிவாளர் ஃபரூக் ஜே பாஷா, எடிட்டர் பிரவீன் கேஎல், கலை இயக்குநர் மிலன், ஆடை வடிவமைப்பாளர் உத்ரா மேனன், வசனம் எழுதிய ஆர்.எஸ். ராமகிருஷ்ணன், ஆடியோகிராஃபர் எஸ்.சிவக்குமார், சவுண்ட் டிசைனர் கிருஷ்ணன் சுப்ரமணியன், ஆக்ஷன் கோரியோகிராஃபர் சக்தி சரவணன், பாடலாசிரியர்கள், பாடகர்கள் மற்றும் இதர தொழில்நுட்பக் கலைஞர்கள் என அனைவருக்கும் நன்றி.
‘நடன சென்சேஷன்’ சாயிஷா சைகல் தனது நடனத்தால் மிகப்பெரிய வெற்றியை ‘ராவடி…’ பாடலின் மூலம் பெற்றுத் தந்துள்ளார். கடைசி நேரத்தில் நடனத்தில் தனது சிறப்பான பங்களிப்பைக் கொடுத்ததற்காக அவருக்கும் எங்களது ஸ்பெஷல் நன்றி” என்று தெரிவிக்கப்பட்டுள்ளது.