நடிகர் பிரபாஸ், ராஜமௌலி இயக்கத்தில் வெளியான பாகுபலி 1 மற்றும் பாகுபலி 2 ஆகிய படங்களின் மூலம் இந்திய அளவில் பிரபலமானவர். 
அதைத்தொடர்ந்து இவரது நடிப்பில் வெளியான சில படங்கள் சில சறுக்குகளை சந்தித்து இருந்தாலும் கடைசியாக வெளியான கல்கி 2898AD திரைப்படம் கிட்டத்தட்ட 1100 கோடிக்கும் அதிகமாக வசூல் செய்து வரலாற்று சாதனை படைத்தது. அடுத்தது பிரபாஸ் நடிப்பில் தி ராஜாசாப் எனும் திரைப்படம் உருவாகி வரும் நிலையில் இந்த படம் அடுத்த ஆண்டு ஏப்ரல் 10ஆம் தேதி திரைக்கு வர தயாராகி வருகிறது. மேலும் நடிகர் பிரபாஸ், ஸ்பிரிட், சலார் 2 போன்ற பல படங்களை கைவசம் வைத்துள்ளார். இதற்கிடையில் பாகுபலி 3 திரைப்படமும் உருவாகப் போவதாக தகவல் கசிந்து வருகிறது. இந்நிலையில் நடிகர் பிரபாஸ், ஹனுமான் படத்தின் இயக்குனருடன் கைகோர்க்க இருப்பதாக புதிய தகவல் வெளிவந்துள்ளன. அதாவது கடந்த ஜனவரி மாதம் பொங்கல் தினத்தை முன்னிட்டு வெளியான ஹனுமான் திரைப்படம் ரசிகர்கள் மத்தியில் வசூல் ரீதியாகவும் விமர்சன ரீதியாகவும் மிகப் பெரிய வெற்றி பெற்றது. இந்த படத்தினை பிரசாந்த் வர்மா இயக்கியிருந்த நிலையில் படத்திற்கு பாராட்டுகளும் குவிந்தன. 
எனவே அடுத்ததாக பிரசாந்த் வர்மா என்ன படம் இயக்கப் போகிறார் என்று எதிர்பார்ப்பு இருந்து வருகிறது. அதன்படி கடந்த சில தினங்களுக்கு முன்னர், நடிகர் கார்த்தி, பிரசாந்த் வர்மாவுடன் கூட்டணி அமைப்பது தொடர்பான அப்டேட்டை கொடுத்திருந்தார். அதேசமயம் பிரசாந்த் வர்மா, பிரபாஸ் கூட்டணியில் புதிய படம் உருவாகப் போவதாகவும் இது தொடர்பான பேச்சுவார்த்தைகள் நடைபெற்று வருவதாகவும் தற்போதைய தகவல்கள் தெரிவிக்கின்றன. இருப்பினும் இனிவரும் நாட்களில் இது தொடர்பான அதிகாரப்பூர்வ அறிவிப்பு வெளியாகும் என்று நம்பப்படுகிறது.