மலையாள நடிகரான பிரித்விராஜ் சுகுமாரன், படம் இயக்குவதிலும் ஆர்வம் உடையவர். அந்த வகையில் மோகன்லால் நடிப்பில் லூசிபர் எனும் திரைப்படத்தை இயக்கி பல்வேறு தரப்பினரிடையே பாராட்டுகளை பெற்றார். இந்த படம் மலையாள சினிமாவிலேயே 200 கோடிக்கு மேல் வசூல் செய்து சாதனை படைத்தது. தற்போது லைக்கா ப்ரொடக்ஷன்ஸ் நிறுவனத்தின் தயாரிப்பில் லூசிபர் 2 -எம்புரான் திரைப்படத்தை இயக்கி வருகிறார் பிரித்விராஜ்.
இதற்கிடையில் பிரித்விராஜ், ப்ளஸ்ஸி இயக்கத்தில் ஆடு ஜீவிதம் – THE GOAT LIFE எனும் திரைப்படத்தில் நடித்துள்ளார். இந்த படம் பென்யமின் எழுதிய கோட் டேஸ் என்ற நாவலை தழுவி உருவாக்கப்பட்டுள்ளது. இந்த படத்திற்கு இந்திய அளவில் மிகப்பெரிய எதிர்பார்ப்பு இருந்து வருகிறது. ஏற்கனவே படத்தின் டீசர் வெளியாகி சினிமா ஆர்வலர்களை வியப்படைய வைத்தது. இந்த படத்தில் பிரித்விராஜ் சுகுமாரன் நஜீப் என்ற கதாபாத்திரத்தில் நடித்துள்ளார். கேரளாவில் இருந்து சௌதி அரேபியாவிற்கு வேலை நோக்கத்திற்காக செல்லும் இவர் ஆடு மேய்க்கும் தொழிலுக்கு அடிமையாக்கப்படுகிறார். அதிலிருந்து இவர் எப்படி தப்பிக்கிறார் என்ற கதைக்களத்தில் ஒரு சர்வைவல் படமாக ஆடு ஜீவிதம் படம் உருவாகியுள்ளது. இந்த படத்திற்காக பிரித்விராஜ் சுகுமாரன் 5 வருடங்களுக்கும் மேலாக கடினமாக உழைத்துள்ளார். 
இந்நிலையில் கடந்த சில தினங்களுக்கு முன்பாக இப்படம் 2024 ஏப்ரல் 10ஆம் தேதி வெளியாக இருப்பதாக பட குழுவினர் அதிகாரப்பூர்வமாக அறிவித்திருந்தனர். ஆனால் தற்போது பட குழுவினர் இப்படம் 2024 மார்ச் 28ஆம் தேதியே ரிலீஸாக இருப்பதாக அறிவித்துள்ளனர். இந்த தகவல் ரசிகர்கள் மத்தியில் பெரும் உற்சாகத்தை ஏற்படுத்தியுள்ளது.