கடந்த 2014 ஆம் ஆண்டு விஷ்ணு விஷால் நடிப்பில் வெளியான படம் முண்டாசுப்பட்டி. இந்தப் படத்தை இயக்குனர் ராம்குமார் இயக்கியிருந்தார். இப்படம் ரசிகர்கள் மத்தியில் நல்ல வரவேற்பு பெற்ற நிலையில் அடுத்ததாக ராம்குமார் விஷ்ணு விஷாலை வைத்து ராட்சசன் திரைப்படத்தையும் இயக்கினார். கிரைம் திரில்லர் ஜானரில் வெளியான இந்த படம் வசூல் ரீதியாகவும் விமர்சன ரீதியாகவும் மாபெரும் வெற்றி படமாக அமைந்தது. இன்றுவரையிலும் இத்திரைப்படம் ரசிகர்கள் மத்தியில் பேசப்படுகிறது.
இந்நிலையில் மூன்றாவது முறையாக ராம்குமார், விஷ்ணு விஷால் கூட்டணியில் புதிய படம் ஒன்று உருவாகி வருகிறது. இந்த படத்தை சத்யஜோதி பிலிம்ஸ் நிறுவனம் தயாரிக்க இருப்பதாக கடந்த ஆண்டே அறிவிப்பு வெளியானது. அதை தொடர்ந்து படப்பிடிப்புகளும் தொடங்கப்பட்டது. சமீபத்தில் கூட இந்த படத்தின் மூன்றாம் கட்ட படப்பிடிப்பு தொடங்கி இருப்பதாக விஷ்ணு விஷால் தனது எக்ஸ் பக்கத்தில் பதிவிட்டிருந்தார். அதன்படி இதன் படப்பிடிப்பு கொடைக்கானல் பகுதியில் விறுவிறுப்பாக நடைபெற்று வருகிறது. 
இந்நிலையில் படக்குழுவினர் இந்த படத்தை 2024 இறுதியில் வெளியிட திட்டமிட்டு இருப்பதாக தெரியவந்துள்ளது. ராட்சசன் படத்திற்கு பிறகு விஷ்ணு விஷால், ராம்குமார் கூட்டணியில் உருவாகி வரும் இந்த படத்தின் மீதான எதிர்பார்ப்பும் ரசிகர்கள் மத்தியில் பெரிய அளவில் இருந்து வருகிறது. ஆகையால் படத்தின் அடுத்தடுத்த அப்டேட்டங்களை பட குழுவினர் விரைவில் வெளியிடுவார்கள் என்று எதிர்பார்க்கப்படுகிறது.