டெடி படத்தின் தெலுங்கு ரீமேக் படி… வெளியானது டிரைலர்…
கடந்த 2021 ஆம் ஆண்டு தமிழில் ஆர்யா நடிப்பில் வெளிவந்த திரைப்படம் டெடி. இந்தப் படத்தினை ஸ்டுடியோ கிரீன் தயாரித்திருந்தது. சக்தி சௌந்தர்ராஜன் படத்தை இயக்கினார். இந்த படத்திற்கு டி இமான் இசையமைத்திருந்தார். படத்தில் ஆர்யாவுடன் இணைந்து சாயிஷா, கருணாகரன், மகிழ்திருமேனி, சாக்ஷி அகர்வால் உள்ளிட்டோர் நடித்திருந்தனர். ஒரு டெடி பியர் பொம்மைக்கு உயிர் கொடுத்து வித்தியாசமான கதைக்களத்தில் உருவான இந்தப் படம் ரசிகர்களிடையே மாபெரும் வரவேற்பு பெற்றது.
இதைத் தொடர்ந்து டெடி திரைப்படம், தெலுங்கில் ரீமேக் செய்யப்பட்டது. இந்தப் படத்தை டார்லிங், கூர்கா, ட்ரிகர் உள்ளிட்ட படங்களை இயக்கிய சாம் ஆண்டன் இயக்கினார். தெலுங்கிலும் ஸ்டுடியோ கிரீன் நிறுவனமே படத்தை தயாரித்து உள்ளது. இந்தப் படத்தில் பிரபல தெலுங்கு நடிகர் அல்லு அர்ஜுனின் சகோதரர் அல்லு சிரிஷ் கதாநாயகனாக நடித்துள்ளார். பிரிஷா சிங், அஜ்மல், ஆலி, முகேஷ் ரிஷி உள்ளிட்டோர் முக்கிய கதாபாத்திரத்தில் நடித்துள்ளனர். தெலுங்கில் ‘படி’ என்று தலைப்பு வைக்கப்பட்டுள்ளது. ஸ்டுடியோ கிரீன் நிறுவனம் படத்தை தயாரித்துள்ளது.
இப்படத்தின் படப்பிடிப்பு மற்றும் பின்னணி வேலைகள் முடிவடைந்தும் படம் வெளியாகாமல் தொடர்ந்து தள்ளிப்போனது. இந்நிலையில், இத்திரைப்படத்தின் டிரைலர் இணையத்தில் வெளியாகி இருக்கிறது. வரும் ஜூலை மாதம் 26-ம் தேதி திரையரங்குகளில் வெளியாக உள்ளது.
