தொலைக்காட்சி நிகழ்ச்சிகளில் தொகுப்பாளராக பணியாற்றிய ரியோ ராஜ், தமிழ் சினிமாவில் நெஞ்சமுண்டு நேர்மையுண்டு ஓடு ராஜா என்ற படத்தின் மூலம் ஹீரோவாக காலடி எடுத்து வைத்தார். 
அதைத்தொடர்ந்து இவர் நடிப்பில் வெளியான ஜோ திரைப்படம், ரியோ ராஜுக்கு மிகப்பெரிய திருப்புமுனையாக அமைந்தது. கடந்த ஆண்டு வெளியான இந்த படம் ரசிகர்கள் மத்தியில் நல்ல வரவேற்பை பெற்று மிகப்பெரிய வெற்றி படமாக அமைந்தது. அதைத் தொடர்ந்து ரியோ ராஜுக்கு பல பட வாய்ப்புகள் குவிந்து வருகின்றன. அந்த வகையில் கலையரசன் தங்கவேல் இயக்கத்தில் புதிய படம் ஒன்றில் அடித்து வருகிறார் ரியோ. இந்தப் படத்தில் ரியோக்கு ஜோடியாக ஜோ படத்தில் நடித்திருந்த மாளவிகா மனோஜ் நடித்து வருகிறார். மேலும் ரியோ ராஜ் மற்றும் ஒரு புதிய படத்தையும் கைவசம் வைத்துள்ளார். அதாவது இந்த படத்தை யுவன் சங்கர் ராஜா தயாரிக்க அறிமுக இயக்குனர் ஸ்வினீத் இயக்குகிறார். 
இந்த படத்தில் சூழல் வெப் தொடரில் நடித்திருந்த கோபிகா ரமேஷ் ரியோ ராஜுக்கு ஜோடியாக நடிக்கிறார். இந்த படத்தின் படப்பிடிப்பு ஏற்கனவே தொடங்கப்பட்டு தொடர்ந்து 40 நாட்கள் விறுவிறுப்பாக நடைபெற்று வந்த நிலையில் தற்போது மொத்த படப்பிடிப்பும் முடிவடைந்துள்ளதாக தெரியவந்துள்ளது. மேலும் படம் தொடர்பான அடுத்தடுத்து அப்டேட்டுகள் இனிவரும் நாட்களில் வெளியாகும் என்று நம்பப்படுகிறது.