மீண்டும் தள்ளிப்போகும் சலார் திரைப்படம்

பிரபாஸ் நடிப்பில் சலார் திரைப்படம் உருவாகி வருகிறது. இதில் பிரபாஸ் உடன் இணைந்து ஸ்ருதிஹாசன், பிரித்விராஜ், ஜெகபதிபாபு உள்ளிட்டோர் முக்கிய கதாபாத்திரங்களில் நடிக்கின்றனர். கே ஜி எஃப் படங்களை இயக்கிய பிரசாந்த் நீல் இயக்கும் இந்த படத்தை ஹோம்பாலே ஃபிலிம்ஸ் நிறுவனம் தயாரிக்கிறது.

சலார் PART 1 CEASE FIRE என்று தலைப்பிடப்பட்டுள்ள இந்தப் படத்தின் டீசர் சில நாட்களுக்கு முன்பாக வெளியாகி படத்தின் மீதான எதிர்பார்ப்பை அதிகப்படுத்தியது. அதைத் தொடர்ந்து இந்த படம் செப்டம்பர் 28ஆம் தேதி வெளியாக இருப்பதாக முன்னதாக அறிவிக்கப்பட்டிருந்தது. ஆனால் படப்பிடிப்பு முழுமையாக நிறைவடையாத காரணத்தால் ரிலீஸ் தேதி ஒத்திவைக்கப்பட்டுள்ளதாக தயாரிப்பு நிறுவனத்தின் தரப்பில் தெரிவிக்கப்பட்டது. டிசம்பர் 22-ம் தேதி இத்திரைப்படம் உலகம் முழுவதும் வெளியாகும் என்று படக்குழு அதிகாரப்பூர்வமாக அறிவித்திருந்தது.

தற்போது, அதே தேதியில் ஷாருக்கான் நடித்திருக்கும் ‘டன்கி’ திரைப்படம் வெளியாக இருக்கிறது. ஷாருக்கான் நடிப்பில் வெளியான, பதான், ஜவான் ஆகிய இரண்டு படங்களும் ஆயிரம் கோடி ரூபாய் வசூலைக் குவித்துள்ளதால், டன்கி படத்திற்கும் எதிர்பார்ப்பு அதிகரித்துள்ளது. அதே நாளில் ‘சலார்’ வெளியானால், வசூல் பாதிக்கப்படும் என்பதால், படத்தின் வெளியீட்டை அடுத்த ஆண்டு தள்ளிவைக்க படக்குழு ஆலோசித்து வருகிறது.