நடிகர் சிவகார்த்திகேயன் நடிப்பில் கடைசியாக அயலான் திரைப்படம் வெளியானது. சயின்ஸ் பிக்சன் கதைக்களத்தில் வெளியான இந்த படம் குழந்தைகள் முதல் பெரியவர்கள் வரை அனைவரையும் கவர்ந்து மிகப்பெரிய வெற்றி படமாக அமைந்தது. 
அதைத்தொடர்ந்து சிவகார்த்திகேயன், ராஜ்குமார் பெரியசாமி இயக்கத்தில் அமரன் எனும் திரைப்படத்தில் நடித்து முடித்துள்ளார். இந்த படமானது 2024 செப்டம்பர் மாதத்தில் வெளியிட திட்டமிடப்பட்டுள்ளது. அதேசமயம் சிவகார்த்திகேயன் பிரபல இயக்குனர் ஏ ஆர் முருகதாஸ் இயக்கத்தில் தனது 23 வது திரைப்படத்தில் நடித்து வருகிறார். SK23 என்று தற்காலிகமாக தலைப்பு வைக்கப்பட்டுள்ள இந்த படத்தில் சிவகார்த்திகேயனுடன் இணைந்து ருக்மினி வசந்த், வித்யூத் ஜம்வால், விக்ராந்த், டான்சிங் ரோஸ் சபீர் என பலரும் நடித்து வருகின்றனர். ஸ்ரீ லட்சுமி மூவிஸ் நிறுவனம் படத்தை தயாரிக்க அனிருத் இதற்கு இசையமைக்கிறார். ஆக்ஷன் நிறைந்த கதைக்களத்தில் இந்த படம் உருவாகி வருகிறது. 
சமீபத்தில் கூட இந்த படத்திற்கு சிங்க நடை என்று தலைப்பு வைத்துள்ளதாக சமூக வலைதளங்களில் செய்திகள் வெளியானது. ஏற்கனவே இந்த படத்தின் படப்பிடிப்பு பாண்டிச்சேரி போன்ற பகுதிகளில் விறுவிறுப்பாக நடைபெற்று வந்த நிலையில் தற்போது இதன் அடுத்த கட்ட படப்பிடிப்பு வருகிற ஜூலை 12ஆம் தேதி தூத்துக்குடியில் நடைபெற இருக்கிறது. அதைத்தொடர்ந்து சென்னையிலும் படப்பிடிப்பு நடத்த திட்டமிடப்பட்டுள்ளது. மேலும் படம் தொடர்பான அடுத்தடுத்த அப்டேட்டுகள் விரைவில் வெளியாகும் என்று எதிர்பார்க்கப்படுகிறது.