எஸ்.ஜே. சூர்யா, கடந்த 1999 ஆம் ஆண்டு அஜித் நடிப்பில் வெளியான வாலி என்ற படத்தில் மூலம் இயக்குனராக தமிழில் சினிமாவில் அறிமுகமானார். அதைத்தொடர்ந்து விஜய் நடிப்பில் குஷி என்ற திரைப்படத்தையும் இயக்கி முன்னணி இயக்குனர்களில் ஒருவராக மாறினார். அதன் பிறகு நடிப்பதிலும் ஆர்வம் காட்டிய எஸ் ஜே சூர்யா, நியூ, வியாபாரி, கள்வனின் காதலி உள்ளிட்ட படங்களில் ஹீரோவாக நடித்திருந்தார். இருப்பினும் எஸ் ஜே சூர்யா நடிப்பில் வெளியான படங்கள் பெரும்பாலும் எதிர்பார்த்த அளவில் வெற்றியை தரவில்லை என்பதால் சில காலம் சினிமாவை விட்டு விலகி இருந்தார். 
அதன் பின்னர் கடந்த 2016 இல் இறைவி என்ற படத்தின் மூலம் கம்பேக் கொடுத்த எஸ் ஜே சூர்யா, ஸ்பைடர், மெர்சல், மாநாடு என அடுத்தடுத்து பல படங்களில் வில்லனாக மிரட்டினார். கடந்த ஆண்டு செப்டம்பர் மாதத்தில் ஆதிக் ரவிச்சந்திரன் இயக்கத்தில் வெளியான மார்க் ஆண்டனி திரைப்படத்தில் எஸ் ஜே சூர்யா வில்லனாக நடித்து பட்டையை கிளப்பி இருந்தார். அடுத்ததாக ராகவா லாரன்ஸ் உடன் இணைந்து ஜிகர்தண்டா டபுள் எக்ஸ் திரைப்படத்திலும் தரமான நடிப்பை கொடுத்திருந்தார். அடுத்ததாக இவர், விக்னேஷ் சிவன் இயக்கத்தில் எல்ஐசி திரைப்படத்தில் முக்கிய கதாபாத்திரத்தில் நடிக்கிறார். 
இவ்வாறு தொடர்ந்து பிஸியாக நடித்து வரும் எஸ் ஜே சூர்யா, ராஜு முருகன் இயக்கத்தில் புதிய படம் ஒன்றில் நடிப்பதற்கு கமிட் ஆகியுள்ளாராம். அதேசமயம் எஸ் ஜே சூர்யா தான் கமிட் ஆகியுள்ள மற்ற படங்களை முடித்துவிட்டு ராஜு முருகன் இயக்கத்தில் நடிப்பார் என்று கூறப்படுகிறது.
இயக்குனர் ராஜு முருகன், குக்கூ, ஜோக்கர், ஜிப்சி, ஜப்பான் உள்ளிட்ட படங்களையும் இயக்கியவர் என்பது குறிப்பிடத்தக்கது.