நடிகர் அஜித் துணிவு படத்திற்குப் பிறகு தனது 62 ஆவது படமான விடாமுயற்சி திரைப்படத்தில் நடித்து வருகிறார்.
மகிழ் திருமேனியின் இயக்கத்திலும் லைக்கா நிறுவனத்தின் தயாரிப்பிலும் உருவாகி வரும் இந்த படத்திற்கு அனிருத் இசை அமைக்கிறார். ஓம் பிரகாஷ் ஒளிப்பதிவு பணிகளை கவனிக்கிறார். இந்த படத்தின் படப்பிடிப்பு கடந்த சில மாதங்களாக நடைபெற்று வரும் நிலையில் தற்போது படப்பிடிப்பு இறுதி கட்டத்தை நெருங்கியுள்ளது. இன்னும் ஓரிரு நாட்களில் ஒட்டுமொத்த படப்பிடிப்பும் நிறைவடைய இருக்கிறது. அதன்படி ஹைதராபாத்தில் கிளைமாக்ஸ் காட்சிகள் படமாக்கப்பட்டுள்ளன. அதைத்தொடர்ந்து ஒரு பாடல் காட்சி மட்டும் ஸ்பெயின் நாட்டில் படமாக்கப்படும் என்று சமூக வலைதளங்களில் செய்திகள் வெளியாகி வருகின்றன. 
இருப்பினும் வருகின்ற ஆகஸ்ட் 17 அல்லது 18-ல் படப்பிடிப்பு நிறைவடைந்தது தொடர்பான அறிவிப்பு வெளியாகும் என்று எதிர்பார்க்கப்படுகிறது. அதேசமயம் நடிகர் அஜித் குட் பேட் அக்லி எனும் திரைப்படத்திலும் நடித்து வருகிறார். ஆதிக் ரவிச்சந்திரன் இயக்கி வரும் இந்த படத்தின் படப்பிடிப்பும் தற்போது ஹைதராபாத்தில் தான் நடைபெற்று வருகிறது. நடிகர் அஜித் விடாமுயற்சி திரைப்படத்தை முடித்துவிட்டு குட் பேட் அக்லி படப்பிடிப்பில் இணைவார் என்று சொல்லப்படுகிறது. இந்நிலையில் நடிகர் அஜித்துடன் எஸ். ஜே. சூர்யா இருக்கும் புகைப்படம் ஒன்று இணையத்தில் வைரலாகி வருகிறது. அதாவது அஜித் நடிப்பில் உருவாகியிருந்த வாலி திரைப்படத்தை எஸ் ஜே சூர்யா தான் இயக்கியிருந்தார். 
அதன் பின்னர் அஜித்துடன் இணைந்து நடிக்க வேண்டும் என விரும்பிய எஸ் ஜே சூர்யா, குட் பேட் அக்லி படத்தில் முக்கிய கதாபாத்திரத்தில் நடிக்கப் போகிறார் என்று ஏற்கனவே செய்திகள் வெளிவந்தன. இந்த சமயத்தில் அஜித்துடன் எஸ்.ஜே சூர்யா இருக்கும் புகைப்படம் வெளிவந்துள்ளதால் குட் பேட் அக்லி படத்தில் எஸ் ஜே சூர்யா நடிப்பது உறுதி தான் என்று ரசிகர்கள் பலரும் கமெண்ட் செய்து வருகின்றனர். இருப்பினும் படக்குழுவினர் சார்பில் இது தொடர்பான அதிகாரப்பூர்வ அறிவிப்பு இனிவரும் நாட்களில் வெளியாகும் என்று நம்பப்படுகிறது.