சிவகார்த்திகேயன் நடிப்பில் அண்மையில் திரையரங்குகளில் வெளியான திரைப்படம் மாவீரன். மடோன் அஸ்வின் இயக்கியிருந்த இப்படத்தில் அதிதி ஷங்கர் நாயகியாகவும், மிஷ்கின், சுனில் ஆகியோர் முக்கிய கதாபாத்திரங்களிலும் நடித்திருந்தனர். இதையடுத்து, ராஜ்குமார் பெரியசாமி இயக்கத்தில் சிவகார்த்திகேயன் நடித்து வருகிறார். இது அவருக்கு 21-வது திரைப்படமாகும். கமல்ஹாசனின் ராஜ்கமல் இண்டர்நேஷனல் நிறுவனம் இப்படத்தை தயாரிக்கிறது. படத்தில் சிவாவுக்கு ஜோடியாக சாய்பல்லவி நடித்துள்ளார். ஜிவி பிரகாஷ் இசை அமைக்கிறார்.
இப்படத்தின் படப்பிடிப்பு ஜம்மு காஷ்மீரில் தொடங்கி நடைபெற்று வருகிறது. படத்தில் சிவகார்த்திகேயன் இரட்டை வேடங்களில் நடிப்பதாகவும், ராணுவ வீரர் வேடத்தில் நடிப்பதாகவும் தகவல் வெளியானது. ஜம்முவில் படப்பிடிப்பு தளத்தில் சாய் பல்லவி எடுத்துக் கொண்ட புகைப்படங்களும் சமூக வலைதளங்களில் வெளியிடப்பட்டது. இந்நிலையில், இப்படத்தின் படப்பிடிப்பு 70 சதவிகிதம் நிறைவு பெற்று விட்டதாகவும், இறுதிக்கட்ட படப்பிடிப்பு விறுவிறுப்பாக நடைபெற்று வருவதாகவும் கூறப்படுகிறது.
