சூப்பர் ஸ்டார் ரஜினிகாந்தின் பிறந்த தினம் (12.12.2023) இன்று.
அது ஒரு காலம்… கண்டக்டர் ஒருவர் பஸ்ஸில் விசிலடித்து பயணிகளை வழி நடத்திக் கொண்டிருந்தார். ஆனால் அந்த கண்டக்டருக்காக பின்னாளில் ஒட்டுமொத்த தமிழகமுமே திரையரங்கில் விசில் அடிக்கும் என்பதை யாரும் எதிர்பார்த்திருக்க மாட்டார்கள். அப்படி ஒரு சரித்திரத்தை தனக்கு சொந்தமாக்கிக் கொண்டவர் மகா கலைஞன் சூப்பர் ஸ்டார் ரஜினிகாந்த். இன்று அவருக்கு 73 வது பிறந்தநாள். ஒவ்வொரு பிறந்தநாளிலும் புதிதாய் பிறந்தது போல நாளுக்கு நாள் அவருக்குள் அதிகமாகிக் கொண்டிருக்கும் எனர்ஜி, இன்றைய இளைஞர்களுக்கு ஒரு பாடம். கருப்பு வெள்ளை, வண்ணப் படம்,3D, மோஷன் கேப்ச்சர் டெக்னாலஜி என சினிமாவின் ஒவ்வொரு பரிணாமத்திலும் உச்சம் தொட்டு முத்திரை பதித்த ஓர் உன்னத கலைஞன். தலைமுறைகள் பல கடந்தும் “சூப்பர் ஸ்டார்” என்னும் அரியாசனத்தை தக்க வைத்துக்கொண்டிருக்கும் ஒரு தலைவன்.
“பேரைத் தூக்க நாலு பேரு… பட்டத்தைப் பறிக்க நூறு பேரு…குட்டி செவத்த எட்டிப் பார்த்தா உசுர கொடுக்க கோடி பேரு….” மிகச் சரியாகத்தான் பொருந்தியிருக்கிறது இவருக்கு. தமிழ் சினிமா மட்டுமல்ல இந்திய திரையுலகம் கூட, எத்தனையோ பேரை “நாயகனாக” ஏற்றுக்கொண்டது ஆனால்”தலைவராக” ஏற்றுக்கொண்டது இவரை மட்டும் தான்.
இன்றைய பல பெரிய ஹீரோக்களுக்கு அவர்களுடைய சிறிய வயதில், தங்கள் சினிமாவில் கதாநாயகர்களாக வேண்டும் என்ற எண்ணமே இவரை பார்த்து தான் தோன்றியிருக்கும் என்றால் அது மிகையாகாது. ஒவ்வொரு ஹீரோவிடமும் இவருடைய ஸ்டைலின் பிரதிபலிப்பு இருப்பதே அதற்கு சாட்சி. திரையில் ரஜினி நடிக்கும் படங்களில் கூலித்தொழிலாளியாக, ஆட்டோகாரராக, பால்காரராக நடித்து ஜெயிக்கும் காட்சிகளை ஒவ்வொரு பாமர ரசிகனும் தான் ஜெயித்தது போலவே உணர்ச்சிவசப்பட வைத்து திரை வழியே மேஜிக்கை நிகழ்த்தியவர். 
கதாநாயகன் என்பவன் வெள்ளைத் தோளுடன் தான் இருக்க வேண்டும் என்ற எழுதப்படாத சட்டத்தை மாற்றி, தமிழ் சினிமாவில் மாஸ்,ஸ்டைல் என்னும் வார்த்தைகளுக்கு இலக்கணம் வகுத்தவரும் இவரே. சினிமா தவிர தனிப்பட்ட வாழ்க்கையில் மிகவும் எளிமையான ஆன்மீக வாழ்க்கையை விரும்புபவர். 1975இல் கே.பாலச்சந்தர் தொடங்கி தற்போது 2023ல் லோகேஷ் கனகராஜ் வரை தமிழ் சினிமாவின் அனைத்து டாப் இயக்குனர்களுடனும் பணியாற்றி வருகிறார். தமிழ் சினிமா வரலாற்றில் இவருடைய பங்கு அளக்க இயலாதது. தரையில் உலவும் சூரியனாய்.. என்றென்றும் இளைஞனாய் வாழ்ந்து கொண்டிருக்கும் சூப்பர் ஸ்டாருக்கு நாமும் பிறந்தநாள் வாழ்த்துக்களை தெரிவித்து மகிழ்வோம்.