சூர்யா நடிக்கும் ரெட்ரோ படத்தின் ஃபர்ஸ்ட் சிங்கிள் ரிலீஸ் குறித்த அப்டேட் வெளியாகி உள்ளது.
நடிகர் சூர்யா தற்போது ஆர்.ஜே. பாலாஜி இயக்கத்தில் உருவாகி வரும் புதிய படத்தில் நடித்து வருகிறார். சூர்யாவின் 45 வது படமான இந்த படத்திற்கு தற்காலிகமாக சூர்யா 45 என்று தலைப்பு வைக்கப்பட்டுள்ளது. மேலும் நடிகர் சூர்யா, வெற்றிமாறன் இயக்கத்தில் வாடிவாசல் திரைப்படத்திலும் நடிப்பதற்கு ஒப்பந்தமாகி இருக்கிறார். இதற்கிடையில் இவர் கார்த்திக் சுப்பராஜ் இயக்கத்தில் தனது 44 ஆவது படமான ரெட்ரோ படத்தில் நடித்து முடித்துள்ளார். 
கேங்ஸ்டர் கலந்த காதல் கதைக்களத்தில் உருவாகும் இந்த படத்தில் சூர்யாவிற்கு ஜோடியாக பூஜா ஹெக்டே நடித்திருக்கிறார். மேலும் கருணாகரன், ஜெயராம், ஜோஜு ஜார்ஜ் மற்றும் பலர் நடித்திருக்கின்றனர். அதே சமயம் இந்த படத்தில் நடிகை ஸ்ரேயா, ஸ்பெஷல் பாடல் ஒன்றுக்கு நடனமாடி இருப்பதாக சொல்லப்படுகிறது. இந்த படத்திற்கு சந்தோஷ் நாராயணன் இசையமைக்க ஸ்ரேயாஸ் கிருஷ்ணா ஒளிப்பதிவு செய்துள்ளார். இதனை சூர்யாவும் கார்த்திக் சுப்பராஜும் இணைந்து தயாரிக்கின்றனர். இந்த படமானது 2025 மே 1ஆம் தேதி திரைக்கு வர முழு வீச்சில் தயாராகி வருகிறது. இதற்கிடையில் இந்த படத்தில் இருந்து அடுத்தடுத்த போஸ்டர்களும் டீசரும் வெளியாகி நல்ல வரவேற்பை பெற்றுள்ளது. 
இந்நிலையில் சூர்யாவும், நடிகை ஸ்ரேயாவும் நடனமாடும் பாடல் விரைவில் வெளியாகும் என புதிய தகவல்கள் தெரிவிக்கின்றன. எனவே இந்த பாடலானது வருகின்ற (ஜனவரி 26) குடியரசு தினத்தை முன்னிட்டு படக்குழுவினரால் வெளியிடப்படும் என எதிர்பார்க்கப்படுகிறது. விரைவில் இது தொடர்பான அதிகாரப்பூர்வ அறிவிப்பு வெளியாகும் என நம்பப்படுகிறது.