சூர்யா விஜய் சேதுபதி நடிக்கும் பீனிக்ஸ் படத்தின் ரிலீஸ் தேதி ஒத்தி வைக்கப்பட்டுள்ளது.
விஜய் சேதுபதியின் மகன் தான் சூர்யா என்பது அனைவரும் அறிந்ததே. இவர் விஜய் சேதுபதி நடிப்பில் வெளியான சிந்துபாத் திரைப்படத்தில் விஜய் சேதுபதியுடன் இணைந்து நடித்திருந்தார். இந்த படம் கடந்த 2019-ல் வெளியிடப்பட்டது. அதைத் தொடர்ந்து சூர்யா , பீனிக்ஸ் எனும் திரைப்படத்தில் நடித்திருக்கிறார். இந்த படத்தை ஸ்டண்ட் மாஸ்டர் அனல் அரசு இயக்கியிருக்கிறார். இதனை பிரேவ் மேன் பிக்சர்ஸ் நிறுவனம் தயாரிக்க சாம் சிஎஸ் இதற்கு இசை அமைத்திருக்கிறார். கடந்த சில மாதங்களுக்கு முன்பாகவே இந்த படத்தின் பூஜை தொடங்கப்பட்ட நிலையில் அதைத்தொடர்ந்து படப்பிடிப்புகளும் மிகத் தீவிரமாக நடைபெற்று வந்தது. அதன்படி படப்பிடிப்புகள் முழுவதும் நிறைவடைந்து படமானது வருகின்றன நவம்பர் 14ஆம் தேதி உலகம் முழுவதும் திரைக்கு வரும் என அறிவிக்கப்பட்டது. ஆனால் தற்போது ஒரு சில காரணங்களால் இந்த படத்தின் ரிலீஸ் தேதி ஒத்தி வைக்கப்பட்டுள்ளது. இதனை படக்குழுவினர் அறிக்கை ஒன்றின் மூலம் அறிவித்துள்ளனர்.
மேலும் அந்த அறிக்கையில், “மிகவும் எதிர்பார்க்கப்படும் பீனிக்ஸ் திரைப்படம் முன்னதாக நவம்பர் 14 வெளியிட திட்டமிடப்பட்டிருந்தது. ஆனால் எதிர்பாராத சூழ்நிலைகள் காரணமாக இந்த படம் ஒத்திவைக்கப்படுகிறது என்பதை வருத்தத்துடன் தெரிவித்துக் கொள்கிறோம். தாங்கள் உங்களுக்கு சிறந்த அனுபவத்தை வழங்க அயராமல் உழைத்து வருகிறோம். புதிய தேதி விரைவில் அறிவிக்கப்படும். தங்களின் தொடர் ஆதரவு மற்றும் புரிதலுக்கும் பொறுமைக்கும் நன்றி” என்று குறிப்பிடப்பட்டுள்ளது.