தளபதி 69 படத்தின் படப்பிடிப்பு இந்திய ராணுவ வீரர்களின் பயிற்சி மையத்தில் நடைபெறுவதாக தகவல் வெளியாகி இருக்கிறது.
தளபதி என்று ரசிகர்களால் கொண்டாடப்படும் நடிகர் விஜய் கடைசியாக கோட் படத்தில் நடித்திருந்தார். இந்த படம் ரசிகர்கள் மத்தியில் நல்ல வரவேற்பை பெற்று கிட்டத்தட்ட 430 கோடிக்கும் அதிகமாக வசூல் செய்தது. இதைத்தொடர்ந்து நடிகர் விஜய், ஹெச். வினோத் இயக்கத்தில் தனது 69ஆவது திரைப்படத்தில் நடித்து வருகிறார். இந்த படத்திற்கு தற்காலிகமாக தளபதி 69 என்று தலைப்பு வைக்கப்பட்டுள்ளது. இந்த படத்தினை கேவிஎன் ப்ரொடக்சன்ஸ் நிறுவனம் தயாரிக்க அனிருத் இதற்கு இசையமைக்கிறார். ஏற்கனவே இந்த படத்தின் படப்பிடிப்பு தொடங்கப்பட்டு விறுவிறுப்பாக நடைபெற்று வருகிறது. 
இந்நிலையில் தளபதி 69 படத்தின் பாடல் காட்சி ஒன்றின் படப்பிடிப்பு சென்னையில் ராணுவ அதிகாரிகளின் பயிற்சி மையத்தில் நடைபெற்று வருவதாக புதிய தகவல் வெளியாகியுள்ளது. அதாவது நேற்று (நவம்பர் 8) நடிகர் விஜய் மற்றும் ஹெச். வினோத் ஆகியோர் ராணுவ அதிகாரிகளுக்காக நடத்தப்பட்ட நிகழ்வில் கலந்து கொண்டு ராணுவ அதிகாரிகளையும் அவரது குடும்பத்தினரையும் சந்தித்து பேசினர்.
இது தொடர்பான புகைப்படங்கள் வைரலாகி வந்த நிலையில் தற்போது தளபதி 69 படத்தின் படப்பிடிப்பு அங்கு நடத்தப்படும் தகவல் சமூக வலைதளங்களில் தீயாய் பரவி வருகிறது. எனவே நடிகர் விஜய் ராணுவ அதிகாரியாக நடித்திருந்த துப்பாக்கி படத்தின் பாடலைப் போல் இந்த பாடல் இருக்கும் என்று எதிர்பார்க்கப்படுகிறது.