‘தளபதி 69’ டைட்டில் ரிலீஸ் குறித்து அப்டேட்…. ஏமாற்றத்தில் ரசிகர்கள்!

விஜய் நடிப்பில் கடைசியாக கோட் திரைப்படம் வெளியானது. இந்த படத்தை வெங்கட் பிரபு இயக்கியிருந்த நிலையில் இப்படம் ரசிகர்கள் மத்தியில் நல்ல வரவேற்பை பெற்றது. இதைத்தொடர்ந்து நடிகர் விஜய் தனது 69 வது திரைப்படத்தில் நடித்து வருகிறார். இதனை கேவிஎன் ப்ரொடக்ஷன்ஸ் நிறுவனம் தயாரிக்க ஹெச். வினோத் இந்த படத்தை இயக்குகிறார். அனிருத் இதற்கு இசையமைக்கிறார். சத்யன் சூரியன் இதன் ஒளிப்பதிவு பணிகளை கவனிக்கிறார். இந்தப் படத்தில் விஜயுடன் இணைந்து பூஜா ஹெக்டே, மமிதா பைஜு, கௌதம் வாசுதேவ் மேனன், பிரகாஷ்ராஜ், ப்ரியா மணி, நரேன், பாபி தியோல் ஆகியோர் முக்கிய கதாபாத்திரங்களில் நடித்து வருகின்றனர். மேலும் இந்த படமானது 2025 அக்டோபர் மாதம் திரைக்கு கொண்டு வர திட்டமிடப்பட்டுள்ளது. இந்த படம் விஜயின் கடைசி படம் என்பதால் இப்படத்தின் மீதான எதிர்பார்ப்பு ஆரம்பத்திலிருந்தே அதிகமாக இருந்து வருகிறது. அதன்படி படம் தொடர்பாக வெளிவரும் ஒவ்வொரு அப்டேட்டுகளையும் ரசிகர்கள் வெகு விமர்சையாக கொண்டாடி வருகின்றனர். இந்நிலையில் தான் வருகின்ற புத்தாண்டு தினத்தை முன்னிட்டு தளபதி 69 படத்தின் ஃபர்ஸ்ட் லுக் போஸ்டர் மற்றும் டைட்டில் வெளியாகும் என செய்திகள் பரவி வந்தது. ஆனால் தற்போது கிடைத்த தகவல் என்னவென்றால் இந்த படத்தின் ஃபர்ஸ்ட் லுக் மற்றும் டைட்டிலை 2025 பொங்கல் பண்டிகையை முன்னிட்டு வெளியிட படக்குழு திட்டமிட்டு வருவதாக லேட்டஸ்ட் அப்டேட் வெளிவந்துள்ளது. இந்த தகவல் விஜய் ரசிகர்களுக்கு ஏமாற்றத்தை தந்துள்ளது.