தளபதி 69 படத்தின் ஷூட்டிங் குறித்த அப்டேட் வெளியாகி உள்ளது.
தளபதி என்று ரசிகர்களால் கொண்டாடப்படுபவர் நடிகர் விஜய். இவரது நடிப்பில் கடைசியாக லியோ திரைப்படம் வெளியாகி வசூல் ரீதியாக மிகப்பெரிய வெற்றி பெற்றது. அதைத் தொடர்ந்து விஜய், வெங்கட் பிரபு இயக்கத்தில் தி கிரேட்டஸ்ட் ஆஃப் ஆல் டைம் எனும் திரைப்படத்தில் நடித்து முடித்துள்ளார். இப்படம் வருகின்ற செப்டம்பர் 5 விநாயகர் சதுர்த்தியை முன்னிட்டு உலகம் முழுவதும் திரையிடப்பட உள்ளது. மிகுந்த எதிர்பார்ப்புகளுடன் உருவாகி உள்ள இந்த படத்தின் டிரைலர் இன்று (ஆகஸ்ட் 17) வெளியாக இருக்கிறது. அதே சமயம் நடிகர் விஜய், தமிழக வெற்றிக் கழகம் என்ற அரசியல் கட்சியை தொடங்கி தனது அரசியல் பிரவேசத்தை தொடங்கியுள்ளார். மேலும் தளபதி 69 திரைப்படம் தான் தனது கடைசி படம் என்றும் கூறியிருக்கிறார். ஏற்கனவே வெளியான தகவலின்படி விஜயின் 69வது படத்தை ஹெச். வினோத் இயக்கப் போகிறார் என்பது சமீபத்தில் உறுதி செய்யப்பட்டது. இதற்கான முழு வேலைகளும் நடைபெற்று வருகின்றன. இதற்கிடையில் தளபதி 69 திரைப்படத்தில் விஜய்க்கு ஜோடியாக நடிகை சமந்தா நடிக்கப் போகிறார் என்று சொல்லப்படுகிறது. இவர்களுடன் இணைந்து நடிகை மமிதா பைஜூ முக்கிய கதாபாத்திரத்தில் நடிப்பதாகவும் தொடர்ந்து பல தகவல்கள் சமூக வலைதளங்களில் பரவி வருகிறது. 
அத்துடன் இப்படம் அரசியல் கதைகளத்தில் உருவாக இருப்பதாக செய்திகள் பரவி வந்த நிலையில் சமீபத்தில் இயக்குனர் ஹெச். வினோத், தளபதி 69 திரைப்படம் அனைவருக்கும் ஏற்ற மாதிரியான கமர்சியல் படம் தான் என்று கூறியிருக்கிறார். ஆகையினால் இந்த படத்தின் படப்பிடிப்பு எப்போது தொடங்கும் என்று ரசிகர்கள் பலரும் எதிர்பார்த்து காத்துக் கொண்டிருக்கின்றனர். தற்போது இது தொடர்பான அப்டேட் வெளிவந்துள்ளது. வருகின்ற அக்டோபர் மாதம் 4ஆம் தேதி தளபதி 69 படப்பிடிப்பு தொடங்க இருக்கிறது என்று நம்பத் தகுந்த வட்டாரங்கள் தெரிவிக்கின்றன. இருப்பினும் இது தொடர்பான அதிகாரப்பூர்வ அறிவிப்பு இனிவரும் நாட்களில் வெளியாகும் என்று நம்பப்படுகிறது.