தளபதி 68 படத்தில் பள்ளி மாணவராக விஜய் நடிப்பதாக தகவல் வெளியாகி உள்ளது.
கோலிவுட் திரையுலகின் ஜாம்பவான் நடிகர் விஜய். தளபதியாக ரசிகர்களால் கொண்டாடப்படும் விஜய் திரையுலகில் 31 ஆண்டுகளை நிறைவு செய்துள்ளார். அவரது நடிப்பில் அண்மையில் வெளியான திரைப்படம் லியோ. இப்படம் இந்தியா முழுவதும் வெளியாகி 600 கோடிக்கு மேல் வசூலித்து சாதனை படைத்தது. லியோ படத்திற்கு பிறகு விஜய் வெங்கட் பிரபு இயக்கத்தில் தனது 68வது படத்தில் நடிக்க இருக்கிறார். தற்காலிகமாக தளபதி 68 என்று தலைப்படப்பட்டுள்ள இந்த படத்தை ஏஜிஎஸ் என்டர்டெயின்மென்ட் நிறுவனம் தயாரிக்க உள்ளது. யுவன் சங்கர் ராஜா இதற்கு இசையமைக்கிறார்.
விஜய் நடிக்கும் 68-வது திரைப்படத்தில் மீனாட்சி சவுத்ரி கதாநாயகியாக நடிக்கிறார். சினேகா, லைலா, மைக் மோகன், விடிவி கணேஷ், ஜெயராம், பிரேம்ஜி, யோகி பாபு, வைபவ், அரவிந்த் ஆகாஷ், அஜ்மல் அமீர், பிரபுதேவா ஆகியோர் முக்கிய கதாபாத்திரங்களில் நடிக்கின்றனர். இப்படத்தின் முதல் கட்ட படப்பிடிப்பு தாய்லாந்தில் நடைபெற்று முடிந்தது. அண்மையில் படக்குழுவினர் அனைவரும் சென்னை திரும்பி, அடுத்த கட்ட படப்பிடிப்பை தொடங்கி இருக்கின்றனர். படத்தின் முதல் தோற்றத்தை புத்தாண்டு அன்று வெளியிட படக்குழு முடிவு செய்திருப்பதாக கூறப்பட்டது. அடுத்த ஆண்டு தீபாவளி பண்டிகைக்கு படத்தை வெளியிட படக்குழு முடிவு செய்துள்ளதாம்.
இந்நிலையில், இந்த படத்தில் விஜய்யை இளமையாக காட்ட டி எஜிங் தொழில்நுட்பத்தை பயன்படுத்தியுள்ளதாக ஏற்கனவே தகவல் வெளியானது. அதன்படி, விஜய் இளமையான தோற்றத்தில் பள்ளி மாணவராக நடிக்க உள்ளதாக சுவாரஸ்ய தகவல் வெளியாகி உள்ளது. இதனால் படத்தின் மீதான எதிர்பார்ப்பு அதிகரித்துள்ளது.