அல்லு அர்ஜுன் நடிப்பில் வெளியான புஷ்பா திரைப்படம் ரசிகர்கள் மத்தியில் ஏகபோக வரவேற்பை பெற்று வசூல் ரீதியாகவும் பிளாக்பஸ்டர் ஹிட் அடித்தது.
செம்மரக்கட்டை கடத்தல் சம்பந்தமான கதைக்களத்தில் வெளியான இந்த படத்தினை சுகுமார் இயக்கியிருந்தார். அடுத்தது மீண்டும் சுகுமார் மற்றும் அல்லு அர்ஜுன் கூட்டணியில் புஷ்பா திரைப்படத்தின் இரண்டாம் பாகம் உருவாகி வருகிறது. அதன்படி புஷ்பா தி ரூல் என்ற தலைப்பில் உருவாகி வரும் இந்த படத்தில் அல்லு அர்ஜுன், ராஷ்மிகா, பகத் பாசில் ஆகியோர் முக்கிய கதாபாத்திரங்களில் நடித்து வருகின்றனர். ஏற்கனவே முதல் பாகத்திலேயே இவர்களின் நடிப்பு பெரிய அளவில் பேசப்பட்டது. இந்நிலையில் இரண்டாம் பாகத்திலும் இவர்களின் நடிப்பை காண ரசிகர்கள் பலரும் ஆவலுடன் காத்துக் கொண்டிருக்கின்றனர். அதன்படி படமானது வருகின்ற டிசம்பர் 5ஆம் தேதி தமிழ், தெலுங்கு, மலையாளம், இந்தி, கன்னடம் உள்ளிட்ட மொழிகளில் உலகம் முழுவதும் திரைக்கு வர முழு வீச்சில் தயாராகி வருகிறது. இதற்கிடையில் படத்திலிருந்து டீசரும் அடுத்தடுத்த பாடல்களும் வெளியாகி ரசிகர்களை வெகுவாகக் கவர்ந்துள்ளது. தற்போது இதன் கூடுதல் தகவல் என்னவென்றால், புஷ்பா 2 படத்தில் ஸ்பெஷல் பாடல் ஒன்றுக்கு நடிகை ஸ்ரீ லீலா நடனம் ஆடியிருக்கிறார் என்று புதிய தகவல்கள் வெளியாகி வருகிறது.
புஷ்பா தி ரைஸ் திரைப்படத்தில் ‘ஊ சொல்றியா மாமா’ பாடலுக்கு நடிகை சமந்தா நடனமாடியிருந்த நிலையில் இந்த பாடல் பட்டி தொட்டி எங்கிலும் பிரபலமானது. எனவே இரண்டாம் பாகத்தில் எந்த நடிகை நடனமாட போகிறார் என்று எதிர்பார்ப்பு இருந்து வந்த நிலையில் தற்போது ஸ்ரீ லீலா நடனமாடியுள்ளார் என்ற தகவல் ரசிகர்களுக்கு இன்ப அதிர்ச்சியை தந்துள்ளது. மேலும் இனிவரும் நாட்களில் இந்த பாடல் வெளியாகும் என எதிர்பார்க்கப்படுகிறது.