தக் லைஃப் படத்தின் முதல் பாடல் ரிலீஸ் குறித்த லேட்டஸ்ட் அப்டேட் வெளியாகியுள்ளது.
தமிழ் சினிமாவில் தனித்துவமான படங்களை இயக்கி ரசிகர்கள் மனதில் நீங்கா இடம் பிடித்திருப்பவர் இயக்குனர் மணிரத்னம். இவரது இயக்கத்தில் கடைசியாக பொன்னியின் செல்வன் பாகம் 1 மற்றும் பாகம் 2 ஆகிய படங்கள் வெளியாகி நல்ல வரவேற்பை பெற்றது. இதைத்தொடர்ந்து மணிரத்னம், கமல்ஹாசன் நடிப்பில் தக் லைஃப் திரைப்படத்தை இயக்கியிருக்கிறார். ஏற்கனவே இந்த கூட்டணி வெற்றி படமான நாயகன் படத்தில் இணைந்திருந்த நிலையில் தக் லைஃப் படத்தின் மீதான எதிர்பார்ப்பும் மிகப்பெரிய அளவில் இருந்து வருகிறது. 
அதுமட்டுமில்லாமல் இந்த படத்தில் கமல்ஹாசன் உடன் இணைந்து சிம்பு முக்கிய கதாபாத்திரத்தில் நடித்திருப்பதும் இப்படத்தின் மீதான எதிர்பார்ப்பிற்கு மற்றுமொரு காரணமாகும். மேலும் இப்படத்தில் திரிஷா, கௌதம் ராம் கார்த்திக், அசோக் செல்வன், ஐஷ்வர்யா லக்ஷ்மி, நாசர் அபிராமி ஆகியோர் நடித்துள்ளனர். இந்த படத்திற்கு ஏ.ஆர். ரகுமான் இசையமைக்க கமல்ஹாசனின் ராஜ்கமல் ஃபிலிம்ஸ் இன்டர்நேஷனல் நிறுவனம் இந்த படத்தை தயாரிக்கிறது. மேலும் இப்படம் 2025 ஜூன் 5 அன்று திரைக்கு வரும் என அறிவிக்கப்பட்டிருக்கிறது. இதற்கிடையில் சமீபத்தில் இந்த படத்தின் முதல் பாடல் விரைவில் வெளியாகும் என அறிவிக்கப்பட்டிருந்தது. 
அதன்படி இந்த பாடல் வருகின்ற ஏப்ரல் 14 தமிழ் புத்தாண்டை முன்னிட்டு வெளியாகும் என பல தகவல்கள் சமூக வலைதளங்களில் வெளிவந்தது. ஆனால் தற்போது கிடைத்த தகவல் என்னவென்றால் வருகின்ற ஏப்ரல் 25 அல்லது 27 ஆம் தேதி தான் தக் லைஃப் படத்தின் முதல் பாடல் வெளியாகும் என சொல்லப்படுகிறது. அதாவது நாளை (ஏப்ரல் 10) குட் பேட் அக்லி திரைப்படம் வெளியாக இருப்பதாலும், ரசிகர்களின் கவனம் முழுக்க இந்த படத்தில் இருக்கும் என்பதாலும் தக் லைஃப் படக்குழு முதல் பாடல் ரிலீஸை தள்ளி வைத்திருக்கலாம் என பலரும் தங்களின் கருத்துக்களை தெரிவித்து வருகின்றனர்.