வைபவ் நடிக்கும் ஆலம்பனா…. ட்ரெய்லர் குறித்த அறிவிப்பு!

சென்னை 600028-2, மங்காத்தா, கோவா, சரோஜா என வெங்கட் பிரபுவின் ஃபேவரைட்டான நண்பர்கள் குழுவை வைத்து எடுத்த படங்களில் முக்கிய கதாபாத்திரங்களில் நடித்தவர் வைபவ். பின்னர் தனி கதாநாயகனாக கப்பல், மேயாத மான், பபூன்,லாக்கப் போன்ற ஹிட் படங்களில் நடித்துள்ளார். இவர் தேர்ந்தெடுக்கும் படங்கள் தன்னுடைய முந்தைய படங்களுக்கு தொடர்பில்லாத மாறுபட்ட கதைகளை கொண்டிருக்கும். மலேசியா டு அம்னீஷியா என்ற வெப் சீரிஸிலும் நடித்து புகழ் பெற்றார். இதுவரை அவர் கதாநாயகன், துணை கதாபாத்திரம், காமெடியன், வில்லன் என அனைத்து கதாபாத்திரங்களிலும் தன் பங்கினை சிறப்பாக செய்து வருகிறார். இந்நிலையில் இவர் புதிதாக நடித்துள்ள ஆலம்பனா படத்தின் டிரைலர் குறித்த அறிவிப்பு வெளியாகி உள்ளது. இந்த படத்தில் வைபவ் கதாநாயகனாக நடிக்க இவருடன் இணைந்து முனீஷ்காந்த், பார்வதி நாயர் உள்ளிட்டோர் முக்கிய கதாபாத்திரங்களில் நடித்துள்ளனர். கே ஜே ஆர் ஸ்டுடியோஸ் நிறுவனத்தின் தயாரிப்பில் பாரி கே விஜய் இதனை இயக்கியுள்ளார். ஹிப் ஹாப் ஆதி இதற்கு இசை அமைத்துள்ளார். இந்த படத்தின் படப்பிடிப்பு கடந்த 2021 ஆம் ஆண்டு தொடங்கப்பட்டது. அதை தொடர்ந்து படத்தின் பர்ஸ்ட் லுக் வெளியாகி நல்ல வரவேற்பை பெற்றது. அதைத்தொடர்ந்து கடந்த வருடம் படத்தின் டீசரும் ரிலீஸாகி படத்தின் மீதான எதிர்பார்ப்பை அதிகப்படுத்தியது. இப்படம்  ஒரு காமெடி என்டர்டெயினர் படமாக உருவாகியுள்ளது. இந்த படத்தில் வைபவ் அலாவுதீனாகவும் முனீஸ்காந்த் பூதமாகவும் நடித்துள்ளார்கள் என்பது ஃபர்ஸ்ட் லுக் போஸ்டரின் மூலம் தெரியவந்தது. மேலும் இப்படம் வருகின்ற டிசம்பர் 15ஆம் தேதி திரையரங்குகளில் வெளியாக இருக்கிறது. இந்நிலையில் இந்த படத்தின் டிரைலர் நாளை காலை 11.04 மணி அளவில் வெளியாக இருப்பதாக படக்குழுவினர் சார்பில் அறிவிக்கப்பட்டுள்ளது.