வெற்றிமாறன் இயக்கத்தில் உருவாகியுள்ள விடுதலை 2 படத்தின் ட்ரைலர் குறித்த அறிவிப்பு வெளியாகியுள்ளது.
பிரபல இயக்குனர் வெற்றிமாறன் கடந்த ஆண்டு சூரி மற்றும் விஜய் சேதுபதி ஆகியோரின் நடிப்பில் விடுதலை பாகம் 1 திரைப்படத்தை இயக்கியிருந்தார். இந்த படம் ரசிகர்கள் மத்தியில் மிகப்பெரிய வரவேற்பை பெற்று வசூல் ரீதியாகவும் விமர்சன ரீதியாகவும் ஹிட் அடித்தது. 
அடுத்தது விடுதலை படத்தின் இரண்டாம் பாகத்தை உருவாக்கி வருகிறார் வெற்றிமாறன். இதில் சூரி மற்றும் விஜய் சேதுபதி தவிர மஞ்சு வாரியர் மற்றும் அட்டகத்தி தினேஷ் ஆகியோர் முக்கிய கதாபாத்திரங்களில் நடித்திருக்கின்றனர். ஆர் எஸ் இன்ஃபோடெயின்மென்ட் நிறுவனமும் கிராஸ் ரூட் நிறுவனமும் இணைந்து தயாரித்துள்ளது. முதல் பாகத்திற்கு இசையமைத்த இளையராஜா தான் இரண்டாம் பாகத்திற்கும் இசையமைத்திருக்கிறார். மிகுந்த எதிர்பார்ப்புகளுடன் உருவாகி வரும் இந்த படம் வருகின்ற டிசம்பர் மாதம் 20ஆம் தேதி திரைக்கு வர முழு வீச்சில் தயாராகி வருகிறது. 
அதன்படி படப்பிடிப்புகளும் ஏறத்தாழ நிறைவடைந்து டப்பிங் பணிகளும் நிறைவடைந்துள்ளது. மேலும் இந்த படத்தில் இருந்து அடுத்தடுத்த போஸ்டர்கள் வெளியாகி நல்ல வரவேற்பை பெற்றதை தொடர்ந்து தினம் தினமும் எனும் முதல் பாடலும் வெளியாகி ரசிகர்களின் கவனம் ஈர்த்துள்ளது. இந்நிலையில் இந்த படத்தின் ட்ரெய்லர் மற்றும் ஆடியோ வருகின்ற நவம்பர் 26 ஆம் தேதி வெளியாகும் என படக்குழுவினர் புதிய போஸ்டர் ஒன்றை வெளியிட்ட அதிகாரப்பூர்வமாக அறிவித்துள்ளனர்.