கடந்த ஜூன் மாதம் 14ஆம் தேதி திரைக்கு வந்த படம் தான் மகாராஜா. இந்த படத்தினை குரங்கு பொம்மை பட இயக்குனர் நித்திலன் சாமிநாதன் இயக்கியிருந்தார். 
இந்த படத்தில் விஜய் சேதுபதி, அனுராக் காஷ்யப், மம்தா மோன்தாஸ், சாச்சனா, சிங்கம் புலி, நட்டி நடராஜ் ஆகிய பலரும் முக்கிய கதாபாத்திரங்களில் நடித்திருந்தனர். வித்தியாசமான கதைக்களத்தில் வெளியான இந்த படம் விஜய் சேதுபதியின் ஐம்பதாவது படமாகும். இந்த படம் ரசிகர்கள் மத்தியில் மிகப்பெரிய வரவேற்பை பெற்று கிட்டத்தட்ட 100 கோடிக்கும் அதிகமாக வசூல் செய்து சாதனை படைத்தது. அதைத்தொடர்ந்து ஓடிடியிலும் வெளியாகி மகுடம் சூடியது. ஹீரோவை விட திரைக்கதைக்கு முக்கியத்துவம் கொடுத்து படத்தை மிக அருமையாக தந்திருந்தார் நித்திலன் சாமிநாதன். இந்த படம் ரசிகர்கள் மத்தியில் மட்டுமல்லாமல் பல்வேறு தரப்பினர் இடையே பாராட்டுகளையும் பெற்றது. 
அடுத்தது இந்த படம் வருகின்ற நவம்பர் 29ஆம் தேதி சீனாவில் வெளியாக இருக்கிறது. அதற்கான முழு ஏற்பாடுகளும் நடைபெற்று வருகின்றன. தற்போது இதன் கூடுதல் தகவல் என்னவென்றால், இந்த படம் சீன மொழியில் சுமார் 40,000 தியேட்டர்களில் திரையிடப்பட இருக்கிறதாம். அதே சமயம் தமிழில் இந்த படம் எப்படி மெகா பிளாக்பஸ்டர் ஹிட் அடித்ததோ, அதேபோல் சீன மொழியிலும் மாபெரும் வெற்றியைப் பெறும் என்று எதிர்பார்க்கப்படுகிறது.