சிறுமியை பாலியல் வன்கொடுமை- வீடியோ எடுத்து மிரட்டிய 6 சிறுவர்கள் கைது
திருச்சியை சேர்ந்த 10 வயது சிறுமியை பாலியல் வன்கொடுமை செய்து வீடியோ எடுத்து மிரட்டிய 6 சிறுவர்களை போக்சோ சட்டத்தில் கைது செய்யப்பட்டுள்ளனர்.
திருச்சியை சேர்ந்த சிறுமி ஒருவரை சிறுவர்கள் சிலர் தனியே அழைத்து சென்று அந்த சிறுமியை பாலியல் வன்கொடுமை செய்து அதை வீடியோ எடுத்து மிரட்டி உள்ளனர். இது தொடர்பாக அந்த சிறுமி அவர் பெற்றோரிடம் தெரிவித்துள்ளார். இதனையடுத்து சிறுமியின் பெற்றோர் பொன்மலை அனைத்து மகளிர் காவல் நிலையத்தில் புகார் அளித்தனர்.
புகார் தொடர்பாக சிறுமியிடம் விசாரணை செய்ததில் அதே பகுதியை சேர்ந்த 6 சிறுவர்கள் பாலியல் வன்கொடுமை செய்து அதனை வீடியோ எடுத்தது மிரட்டியதாக போலீசாரிடம் தெரிவித்துள்ளார். அதன் அடிப்படையில் பொன்மலை மகளிர் காவல் நிலைய போலீசார் வழக்கு பதிவு செய்து 6 சிறார்களையும் அழைத்து விசாரணை செய்து அவர்கள் அனைவரையும் போக்சோ சட்டத்தின் கீழ் கைது செய்தனர். தொடர்ந்து நீதிமன்றத்தில் ஆஜர்படுத்தி திருச்சியில் உள்ள சிறுவர்களுக்கான கூர்நோக்கு இல்லத்தில் அவர்களை அடைத்தனர்.