அ.ம.மு.க பிரமுகரான மீன் வியாபாரி வெட்டி கொலை
சென்னை நொளம்பூர் அருகே அ.ம.மு.க பிரமுகரான மீன் கடைக்காரரை சரமாரியாக வெட்டி கொலை செய்த மர்ம கும்பலை போலீசார் தேடிவருகின்றனர்.
சென்னை நொளம்பூர் காவல் நிலைய எல்லைக்கு உட்பட்ட ரெட்டிபாளையம் பிரதான சாலையில் மீன் கடை வைத்திருந்தவர் ஜெகன் என்கிற ஜெகதீஷ் (45). திருவாரூர் மாவட்டத்தை சேர்ந்த அ.ம.மு.க பிரமுகரான இவர் நேற்று (05.09.2023) இரவு வழக்கம் போல் தனது ஜே.கே மீன் கடையில் வியாபாரம் செய்து கொண்டிருந்தபோது 4 பேர் கொண்ட மர்ம கும்பல் கடைக்குள் புகுந்து கடையில் மீன் வைத்திருந்த கத்தியை எடுத்து சரமரியாக வெட்டியதுடன், கடையின் வெளியே இழுத்து வந்து சாலையில் வைத்து தலை, கழுத்து உள்ளிட்ட பகுதிகளில் பலமாக வெட்டிவிட்டு தப்பி சென்றுள்ளனர்.
இதில் ரத்தம் அதிகமாக வெளியேறி ஜெகன் சம்பவ இடத்திலேயே பரிதாபமாக பலியானார். பின்னர் தகவல் அறிந்து சம்பவ இடத்துக்கு வந்த நொளம்பூர் காவல் நிலைய சட்டம் ஒழுங்கு ஆய்வாளர் ஜார்ஜ் மில்லர் தலைமையிலான தனிப்படை போலீசார் உடலை மீட்டு அரசு கீழ்ப்பாக்கம் மருத்துவமனைக்கு பிரேத பரிசோதனைக்காக அனுப்பி வைத்துள்ளனர்.
கொலை செய்யப்பட்ட ஜெகன் மனைவியிடம் புகாரை பெற்ற நிலையில் அப்பகுதியில் உள்ள சிசிடிவி கேமராக்களை ஆய்வு செய்து வரும் போலீசார் முன்பகை காரணமாக கொலை செய்தார்களா, தொழில் போட்டியா அல்லது வேறு ஏதும் காரணங்கள் உள்ளதா என பல்வேறு கோணங்களில் விசாரணை மேற்கொண்டு வருகின்றனர்.
மக்கள் புழக்கம் அதிகமாக இருக்கும் நொளம்பூர் ரெட்டிபாளையம் பிரதான சாலையில் பொதுமக்களின் கண் முன்பே மீன் கடைக்காரர் வெட்டி படுகொலை செய்த சம்பவம் அப்பகுதியில் பெரும் பரபரப்பு ஏற்பட்டுள்ளது.