கேரளாவில் மோசடி உட்பட பல்வேறு குற்ற செயல்களில் ஈடுபட்டு, 6 மாதங்களுக்கு மேல், தலை மறைவாக இருந்த இளைஞர் ஒருவர், சென்னையில் இருந்து விமானம் மூலம், வெளிநாட்டுக்கு தப்பிச் செல்ல முயன்ற போது, சென்னை விமான நிலையத்தில் கைது செய்யப்பட்டுள்ள
கேரள மாநிலம் திருச்சூரை சேர்ந்த தலைமறைவு குற்றவாளி, சென்னையில் இருந்து விமானம் மூலம், தாய்லாந்து நாட்டிற்கு தப்பிச்செல்ல முயன்ற போது, சென்னை விமான நிலையத்தில் குடியுரிமை சோதனையில் கண்டுபிடிக்கப்பட்டு, அவருடைய பயணம் ரத்து செய்யப்பட்டு, சென்னை விமான நிலைய காவல் நிலையத்தில் ஒப்படைத்துள்ளனர்.
கேரளா மாநிலம் திருச்சூர் பகுதியைச் சேர்ந்தவர் நிஜாமுதீன் கபீர் (24). இவர் மீது திருச்சூர் மாவட்ட குற்றப்பிரிவு போலீசில், கடந்த மார்ச் மாதம் மோசடி உட்பட பல்வேறு பிரிவுகளில் வழக்குகள் பதிவு செய்யப்பட்டன. இதை அடுத்து திருச்சூர் மாவட்ட குற்றப்பிரிவு போலீசார், நிஜாமுதீன் கபீரை கைது செய்து, விசாரணை நடத்துவதற்காக தேடி வந்தனர். ஆனால் அவர் போலீசில் சிக்காமல், தொடர்ந்து தலைமறைவாக இருந்து வந்துள்ளார்.
அதோடு நிஜாமுதீன் கபீர் வெளிநாட்டுக்கு தப்பி செல்ல முயற்சி செய்கிறார் என்ற தகவல், போலீசுக்கு கிடைத்தது. இதை அடுத்து திருச்சூர் மாவட்ட போலீஸ் சூப்பிரண்டு, நிஜாமுதீன் கபீரை, தேடப்படும் தலை மறைவு குற்றவாளியாக அறிவித்தார். அதோடு அனைத்து சர்வதேச விமான நிலையங்களிலும் எல் ஓ சி யும் போடப்பட்டிருந்தது. இந்த நிலையில் நிஜாமுதீன் கபீர் வெளி மாநிலங்களுக்கு சென்று, அங்கிருந்து விமானம் மூலம் வெளிநாட்டிற்கு தப்பிச்செல்ல திட்டமிட்டார்.
இந்த நிலையில் நேற்று ஞாயிறு நள்ளிரவு, சென்னை சர்வதேச விமான நிலையத்தில் இருந்து, தாய்லாந்து நாட்டு தலைநகர் பாங்காக் செல்லும், ஏர் ஏசியா பயணிகள் விமானம், புறப்பட தயாராகிக் கொண்டு இருந்தது. அந்த விமானத்தில் பயணம் செய்ய வந்த பயணிகளின் பாஸ்போர்ட் மற்றும் ஆவணங்களை, சென்னை விமான நிலைய குடியுரிமை அதிகாரிகள் பரிசோதித்து, பயணிகளை விமானத்தில் ஏற அனுமதித்துக் கொண்டு இருந்தனர்.
அப்போது கேரளா மாநில தலைமறைவு குற்றவாளி நிஜாமுதீன் கபீர், இந்த விமானத்தில் சென்னையில் இருந்து தாய்லாந்து நாட்டிற்கு தப்பிச் செல்வதற்காக, சென்னை விமான நிலையத்திற்கு வந்திருந்தார். அவருடைய பாஸ்போர்ட் ஆவணங்களை குடியுரிமை அதிகாரிகள், கம்ப்யூட்டரில் பரிசோதித்த போது, இவர் கடந்த 6 மாதங்களுக்கும் மேலாக, தலை மறைவாக இருக்கும், கேரள மாநில போலீசாரால் தேடப்படும் குற்றவாளி என்பது தெரிய வந்தது. இதை அடுத்து குடியுரிமை அதிகாரிகள், அவரை சுத்தி வளைத்து பிடித்தனர். அதோடு அவருடைய பாங்காக் விமான பயணத்தையும் ரத்து செய்தனர். மேலும் சென்னை விமான நிலைய காவல் நிலையத்தில் ஒப்படைத்து, காவலில் வைக்கப்பட்டுள்ளார்.
அதோடு குடியுரிமை அதிகாரிகள் கேரள மாநிலம் திருச்சூர் மாவட்ட போலீஸ் சூப்பிரண்டுக்கு, தேடப்படும் தலை மறைவு குற்றவாளி நிஜாமுதீன் கபீர், சென்னை விமான நிலையத்தில் சிக்கியுள்ளார் என்ற தகவலை தெரிவித்துள்ளனர். இதை அடுத்து கேரளாவில் இருந்து தனிப்படை போலீசார், சென்னை விமான நிலையத்திற்கு வந்து கொண்டு இருப்பதாக தெரிய வந்துள்ளது.