தொகுதி மறுவரைக்கு எதிராக ஒரே குரலில் ஒன்றிய பாஜக அரசின் செயலுக்கு எதிர்ப்பு – சா.மு.நாசர்

100 நாள் வேலை வாய்ப்புத்திட்டத்திற்கு தமிழ்நாட்டுக்கு தர வேண்டிய ரூ 4000 கோடியைத் தராமல் ஒன்றிய அரசு வஞ்சித்து வருவதாக அமைச்சர் சா.மு. நாசர் குற்றம் சாட்டியுள்ளாா்.

இது குறித்து சிறுபான்மை நலத்துறை அமைச்சர் சா.மு.நாசர் செய்தியாளர்களை சந்தித்தார். அப்போது அவர்,”மக்கள் தொகை அடிப்படையிலான நாடாளுமன்ற தொகுதி மறுவரையறை என்பது நமது தலையின் மீது தொங்கும் கத்தியைப் போன்றது. தமிழ்நாட்டின் நாடாளுமன்ற உறுப்பினர்களின் (MPகளின்) பலத்தைக் குறைத்து நமது அரசியல் பிரதிநிதித்துவத்தைக் குறைக்கும் எந்தவொரு நடவடிக்கையும் மாநிலத்தின் உரிமைகளின் மீதும் மக்களின் நலன்களின் மீதும் நேரடியாய் தொடுக்கப்படும் தாக்குதலாகும்.

தமிழ்நாடு முதலமைச்சர் அவர்கள் இந்தியாவிற்கே வழிகாட்டியாய் திகழ்கிறார். அவர் நமது தமிழ்நாட்டின் நலனுக்காக மட்டுமின்றி தொகுதி மறுவரையறையால் பாதிக்கப்படும் அனைத்து மாநிலங்களுக்காகவும் முன்னணியில் நின்று போராடி வருகிறார். மேலும் முதலமைச்சர் அவர்கள் தலைமையில் மார்ச் 5 ஆம் தேதி ஒன்றிய பாஜக அரசின் தொகுதி மறுவரையறை சதிக்கு எதிராக சென்னை தலைமைக் செயலகத்தில் கூட்டப்பட்ட அனைத்து கட்சி கூட்டத்தில் அழைக்கப்பட்ட 63 கட்சிகளில் 58 அரசியல் கட்சிகள் கலந்து கொண்டு முதலமைச்சரின் முடிவை ஆதரித்து ஒரே குரலில் ஒன்றிய பாஜக அரசின் செயலுக்கு எதிர்ப்பு தெரிவித்தது ஒரு வரலாற்று முக்கியத்துவம் வாய்ந்த நிகழ்வாகும்.

நியாயமான தொகுதி மறுவரையறை மேற்கொள்ள வேண்டும் என தீர்மானங்கள் ஒருமனதாக நிறைவேற்றப்பட்டன. மேலும் இந்த தொகுதி மறுவரையறையால் பாதிக்கப்படும் மற்ற மாநிலங்களை அணுகி, நியாயமான தொகுதி மறுவரையறை மேற்கொள்வதை உறுதி செய்ய ஒரு கூட்டு நடவடிக்கைக் குழுவை (JAC) உருவாக்குவதற்கான தீர்மானமும் நிறைவேற்றப்பட்டது.

அதனடிப்படையில், கடந்த 22 ஆம் தேதி முதலமைச்சர் தலைமையில் சென்னையில் கூட்டு நடவடிக்கை குழு கூட்டம் நடைபெற்றது. அதில் மூன்று மாநில முதலமைச்சர்கள், துணை முதலமைச்சர், தலைவர்கள் என தொகுதிவரையறையால் பாதிக்கப்படும் தமிழ்நாடு, தெலங்கானா, கர்நாடகா, ஒடிசா, கேரளா, பஞ்சாப் உள்ளிட்ட 6 மாநில பிரதிநிதிகள் காலந்து கொண்டனர். மக்கள் தொகை கட்டுப்பாட்டு நடவடிக்கைகளை ஊக்குவிக்கும் விதமாக 1971-ஆம் ஆண்டு மக்கள் தொகையின் அடிப்படையிலான நாடாளுமன்ற தொகுதிகளின் எண்ணிக்கையே தொடரும் என அறிவிக்கப்பட்டது. இன்றுவரை அந்த எண்ணிக்கையே தொடர்கிறது.

1971-ஆம் ஆண்டு கணக்கின்படி தமிழ்நாடு உள்ளிட்ட மாநிலங்களில் ஒவ்வொரு பத்தாண்டுக்கான மக்கள் தொகை வளர்ச்சி என்பது 23.41% ஆகவும், வட மாநிலங்களில் 24.39% ஆகவும் இருந்து, அதாவது இரு பகுதிகளிலும் மக்கள்தொகை வளர்ச்சியானது சமநிலையில் இருந்தன. அதன்பிறகு மக்கட்தொகை கட்டுப்பாட்டுத் திட்டங்கள் தீவிரப்படுத்தப்பட்டன. தமிழ்நாடு உள்ளிட்ட தென்மாநிலங்கள் மிகச் சிறப்பாகக் கட்டுப்படுத்தின. அதன் விளைவாக தற்போது வட மாநிலங்கள் உத்தரப்பிரதேசம், பிஹார், மத்தியப்பிரதேசம், உள்ளிட்ட மாநிலங்களுக்கும் பாதிக்கப்படவுள்ள தமிழ்நாடு உள்ளிட்ட மாநிலங்களுக்கும் இடையில் மக்கள் தொகை வளர்ச்சியில் பெரும் வேறுபாடு உள்ளது.

தற்போது கணக்கின்படி பார்த்தால், தமிழ்நாடு, கர்நாடகா உள்ளிட்ட மாநிலங்கள் மக்கட்தொகையின் பத்தாண்டு வளர்ச்சி விகிதத்தை 12.51% ஆகக் குறைத்தன, அதேசமயம் வட மாநிலங்கள் 21.83% என்ற உயர் வளர்ச்சி விகிதத்திலேயே உள்ளன. வெறும் மக்கட்தொகை வித்தியாசம் மட்டுமில்லை- பொருளாதாரத்தையும் கவனத்தில் எடுத்துக் கொள்ள வேண்டும். மக்கள்தொகையைச் சிறப்பாக குறைத்துள்ள தமிழ்நாடு, கேரளா, கர்நாடகா, ஆந்திரா, தெலங்கானா, ஒடிசா, பஞ்சாப் ஆகிய மாநிலங்கள் இந்திய பொருளாதாரத்தில் கணிசமாக பங்களிக்கின்றன. அவற்றின் மொத்த மாநில உள்நாட்டு உற்பத்தி (GSDP) பங்கு 36% ஆகும், ஆனால் மத்திய அரசிடமிருந்து திரும்பக் கிடைக்கும் வரிப் பகிர்வு வெறும் 27% மட்டுமே.

அதுவே பீஹார், உத்தரபிரதேசம், மத்தியப்பிரதேசம், ராஜஸ்தான் ஆகிய மாநிலங்கள் GSDP-யில் 20% மட்டுமே பங்களிக்கின்றன, ஆனால் அவை 42.5% என்ற பெரும்பங்கை வரி பகிர்வாக பெற்று வருகின்றன. இது நியாயமற்ற பகிர்வு முறை, அதாவது இந்திய பொருளாதார வாளர்ச்சிக்கு பெரும் பங்காற்றும் மாநிலங்களுக்கு குறைந்த அளவும், குறைந்த பொருளாதார உற்பத்தி கொண்ட மாநிலங்களுக்கு அதிக பங்கும் கிடைத்து வருகிறது. ஒவ்வொரு 100 ரூபாய்க்கும் தமிழ்நாடு 29 ரூபாயும், கர்நாடகா 14 ரூபாயும் என மிக குறைந்தளவே பெறுகின்றன, மாறாக, நான்கு வட மாநிலங்கள் தாங்கள் செலுத்தும் ஒவ்வொரு ரூ 100-க்கும் சாரசரியாக 425 ரூபாய் பெறுகின்றன. பீகார் மட்டுமே 922 ரூபாய் பெறுகிறது.

மக்கள் தொகையை அடிப்படையாகக் கொண்டு தொகுதி மறுவரையறை மேற்கொள்ளப்பட்டால் தமிழ்நாடு, ஆந்திரா, கர்நாடகா, கேரளா உள்ளிட்ட ஏழு மாநிலங்களுக்கு அது அநீதியாக அமையும். எம்.பிக்களின் எண்ணிக்கை குறையும், அதனால் அரசியல் பிரதிநிதித்துவமும் குறையும். மக்கள் தொகைக் கட்டுப்பாட்டை வெற்றிகரமாக செயல்படுத்திய மாநிலங்களை இந்த தொகுதி மறுவரையறை தண்டிக்கிறது. இது கூட்டாட்சி தத்துவதற்கே எதிரானது. தேசிய கொள்கைகளை பின்பற்றிய மாநிலங்கள் நியாயமாக பாராட்டப்பட வேண்டும், மாறாக தண்டிக்கப்படக்கூடாது. இத்தகைய முயற்சி ஆபத்தான முன்னுதாரணனமாக அமையும்.

நாடாளுமன்ற தொகுதிகளின் இழப்பு என்பது வெறும் எண்ணிக்கை குறைவு மட்டுமல்ல — இது நமது அரசியல் பலம், உரிமைகள் மற்றும் நம் எதிர்காலத்தையே வீழ்ச்சிப்பாதையில் கொண்டு சென்றுவிடும். குறைவான அரசியல் பிரதிநிதிகள் இருந்தால் நமது மாநிலங்கள் நியாயமான நிதியைப் பெறுவதிலும், கொள்கைகளை பாதுகாப்பதிலும், மக்களின் தேவைகளை ஒன்றிய அரசிடம் கேட்டு பெறுவதிலும் கடுமையான சவால்களை எதிர்கொள்ள வேண்டியது வரும். பாஜக தலைமையிலான ஒன்றிய அரசும் அதன் அமைச்சர்களும் தொகுதி மறுவரையறைப் பிரச்சினையில் அமைதியாக உள்ளனர், தமிழ்நாட்டிற்கு எந்த உறுதிமொழிகளையும் இதுவரை வழங்கவில்லை. மாறாக, பிரதமர் நரேந்திர மோடி மற்றும் உள்துறை அமைச்சர் அமித்ஷா ஆகியோரின் தெளிவற்ற, சப்பைக்கட்டு பேச்சுகளை நம்பச் சொல்கின்றனர்.

கடந்த வாரத்தில், இப்பிரச்சனை தொடர்பாக நாடாளுமன்றத்தில் குரல் எழுப்பவும், அதை பற்றி பேசவுமே நமது நாடாளுமன்ற உறுப்பினர்களை அனுமதிக்கவில்லை. இது ஒன்றிய பாஜக அரசு நமது நியாயமான அச்சத்தை போக்க கூட விரும்பவில்லை காரணம் அதை தான் அவர்கள் செய்ய நினைக்கிறார்கள் என்பது வெட்ட வெளிச்சமாக தெரிகிறது. “தமிழ்நாட்டு மக்களை நாகரிகமற்றவர்கள் என்று ஒன்றிய அமைச்சர் கூறிய கருத்து, பாஜக-வின் நம்மைப் பற்றிய இழிவான பார்வையை வெளிப்படுத்துகிறது. இப்போதே இந்நிலைமை என்றால் நமது நாடாளுமன்ற உறுப்பினர் எண்ணிக்கையும் குறைக்கப்பட்டால் எவ்வளவு அலட்சியப்படுத்துவார்கள் என்பதை நினைத்து பாருங்கள்.”மணிப்பூரை கொஞ்சம் பாருங்கள்- குறைந்த அரசியல் பிரதிநிதித்துவம் இருந்த காரணத்தால் ஒன்றிய பாஜக அரசால் கைவிடப்பட்டு புறக்கணிக்கப்பட்டது. நமது குரலும் நாடாளுமன்றத்தில் பலவீனமடைந்தால் தமிழ்நாட்டிற்கும் அதே நிலை தான் ஏற்படும்.”

இந்த சூழலில், தமிழ்நாடு முதலமைச்சர் மு.க. ஸ்டாலின் அவர்கள் தலைமையில் ஏற்பாடு செய்யப்பட்ட கூட்டு நடவடிக்கைக் குழுக் கூட்டம், தமிழ்நாடு உட்பட தொகுதி மறுவரையறையால் பாதிக்கப்படவிருக்கும் மாநிலங்களை ஒருங்கிணைத்து உறுதியாக எதிர்ப்பை வெளிப்படுத்தியதால் தேசிய முக்கியத்துவம் வாய்ந்ததாக மாறி உள்ளது. மற்ற ஏழு மாநிலங்களைச் சேர்ந்த முதலமைச்சர்கள், துணை முதலமைச்சர்கள் மற்றும் முன்னாள் அமைச்சர்கள் போன்ற மூத்த தலைவர்களை ஒன்றிணைத்து, நியாயமான தொகுதி மறுவரையறை கோரிக்கையை வலுப்படுத்தும் விதமாக பாதிக்கப்படும் அனைத்து மாநிலங்களும் ஒருங்கிணைந்து ஒரே குரலாய் ஒலிப்பதை உறுதி செய்துள்ளார் முதலமைச்சர் அவர்கள். இவ்வளவு பேர் கூடியிருப்பது வரலாற்று முக்கியத்துவம் வாய்ந்தது.

நமது ஊடக நண்பர்களுக்கும் இந்த பிரச்சினையை உற்று நோக்கும் அனைவரும் – இப்போது சேர்ந்து குரல் கொடுக்க வேண்டிய நேரமிது. வரப் போகும் தொகுதி மறுவரையறை ஒரு பெரும் சவாலை முன்வைக்கிறது, பொது விவாதம் வலுவாக இருந்தால்தான் இந்த பேராபத்தில் இருந்து தற்காத்து கொள்ளும் போராட்டமும் வலுவடையும். தமிழ்நாட்டோடு பிற பாதிக்கப்படும் மாநிலங்களும் ஒன்றிணைந்துள்ளன, இப்போது அனைத்து ஜனநாயக சக்திகளும் நியாயமான பிரதிநிதித்துவத்திற்கான இந்த போராட்டத்தில் எங்களுடன் நிற்க வேண்டும் என கேட்டுக்கொள்கிறோம். ஒன்றிய அரசு நியாயமான மற்றும் நமது உரிமைகளை பாதிக்காத தொகுதி மறுவரையறையை மேற்கொள்ள வேண்டும் இல்லை என்றால் தொகுதி மறுவரையறையே அடுத்த 25 ஆண்டுகளுக்கு தள்ளி வைக்க வேண்டும் அதுவரை இந்த போராட்டத்தில் நமது முதலமைச்சர் அவர்களோடு தமிழ்நாட்டு மக்கள் அனைவரும் ஒருங்கிணைந்து நிற்க வேண்டும் அப்போது தான் நமது உரிமைகளை பாதுகாக்க முடியும் இவ்வாறு சா.மு.நாசர் கூறியுள்ளாா்.

பாஜக அரசின் புருடா… வஞ்சிக்கப்படும் தமிழகம்… காந்திதேசமே இது நியாயமில்லையா?